‘बालवालिकाको बजेट अरू ठाउँमा खर्च हुँदैन’

नयाँ स्थानीय तहका जनप्रतिनिधीहरूले वालवालिकाका लागी विनियोजन हुने बजेट अन्यत्र खर्च नगर्ने प्रतिवद्धता जनाएका छन् । नुवाकोटको पञ्चकन्या गाउँपाकिलाका जनप्रतिनिधिहरूले उक्त प्रतिवद्धता जनाएका हुन् । पञ्चकन्या गाउँपालिकाकी उपप्रमुख सृजना खड्का पराजुलीले वालवालिकालाई विनियोजन हुने बजेट अन्य क्षेत्रमा खर्च नगर्ने बताईन् ।

“विगतमा के भयोभन्दा पनि अब के हुन्छ ? भन्ने कुरा महत्वपूर्ण छ,” पराजुलीले भनिन्, “हामी भरखरै निर्वाचित भएर आएका छौं, वालवालिकाका लागी आवश्यक बजेट विनियोजन गर्छौं । सम्बन्धित क्षेत्रमा बजेट खर्च भए/नभएको अनुगमन गर्छौं ।” साथै वालमैत्री स्थानीय तह घोषणा गर्न आवश्यक तयारी गर्न पनि तत्पर रहेको बताईन् ।

यसै गरि २ नं. वडाका अध्यक्ष ध्रुबप्रसाद मिश्रले वालवालिकाका लागी बजेट कमी हुन नदिने दाबी गरे । “राष्ट्रिय माविले १ लाख रुपैयाँ माग गरेको रहेछ, अपुग हुन्छ भनेर मैले २ लाख रुपैयाँ विनियोजन गरें,” मिश्रले भने, “कापी, कलम, ड्रेसको अभावले कुनै पनि वालवालिका विद्यालय जान सकेनन् भने वडा कार्यालयमा सम्पर्क राख्नुहोला ! आवश्यक बजेट विनियोजन गर्छु ।”

वालवालिकाका लागी विनियोजित बजेटबाट कार्यालय सजावट, मसलन्द खरिद, शिक्षकको सुविधाका लागी खर्च गर्न नदिने र त्यसरी खर्च भएको पाइएमा कारवाही गने मिश्रले बताए । आफ्नो वडालाई छिट्टै वालमैत्री घोषणा तयार रहेको मिश्रले बताए । कार्यक्रममा मिरेष्ट नेपालले बालमैत्री स्थानीय शासनसम्बन्धि बृत्तचित्र प्रदर्शन गरेको थियो । कार्यक्रमका बारे मिरेष्टका महासचिव कुमार यात्रुले प्रकाश पारेका थिए ।