अनुगमन थालेपछि काठमाडौं महानगरमा नक्सापास विपरित घर बनाउने घटे

१२ कात्तिक, काठमाडौं । काठमाडौं महानगरपालिकाले निर्माणधीन घरहरूमा अप्रत्यक्ष अनुगमन गरेपछि नियमविपरित घर बनाउने परिपाटी घट्दै गएको छ । महानगरका इञ्जिनियर राम थापाका अनुसार गएको साउनबाट महानगरभित्र निर्माण हुने सबै घरमा इञ्जिनियरले अप्रत्यक्ष रुपमा अनुगमन गरिरहेका छन् ।

अनुगमन नियमित हुन थालेसँगै नक्साविपरीत भवन निर्माण गर्नेको सङ्ख्यामा कमी आएको हो । महानगरको सबै वडामा दैनिक ३० जना इञ्जिनियरले निर्माणाधीन घरहरूको अप्रत्यक्ष रुपमा अनुगमन गरिरहेका छन् । घरधनीले महानगरबाट नक्सा पास गरिसकेपछि आफूले चाहेको इञ्जिनियर राख्न पाउँछ । जसका कारण नक्सापास विपरित घर निर्माण हुँदै आएके थियो ।

खटिएका इञ्जिनियरले दैनिक १० देखि १५ वटासम्म घरको अनुगमन गर्दै आएको थापाले जानकारी दिए । अनुगमनका क्रममा नक्सा विपरीत घर निर्माण भएको पाए काम रोकेर कारवाही प्रक्रिया अघि बढाउन थालेको छ ।

अघिल्लो बष नियमविपरित घर बनाउनेको सङ्ख्या धेरै भएपनि अहिले २० वटा निर्माणधीन घरमध्ये मुस्किलले एक दुईवटा मात्र नक्सापास विपरितका पाइन्छन् । गत साउन महिनाभन्दा पहिले निर्माण हुने घरमध्ये ५० प्रतिशत नियम विपरीत हुने गरेको थियो । रासस