Logo

चितवनमा दलहरूलाई उम्मेद्वार छान्न सकस, चुनावी गतिविधि तीव्र



चितवनको स्थानीय तहको निर्वाचनमा दलहरूलाई उम्मेदवार छान्न सकस परेको छ । आकाङ्क्षी धेरै भएकाले उनीहरूलाई नाम छान्न सकस देखिएको हो ।

जिल्लाका दलका नेताहरूले चैतको २५ देखि २८ गतेसम्ममा उम्मेद्वर तय गरिसक्ने बताए पनि अझै तय गर्न सकेका छैनन् ।

नेपाली कांग्रेस जिल्ला कोषाध्यक्ष शङ्कर कँडेलले अहिले उम्मेद्वार चयन प्रक्रिया चलिरहेको बताए । भरतपुर महानगरपालिकामा सर्वसम्मत हुन नसके पार्टीको केन्द्रले तय गर्ने कँडेलले बताए ।

“खैरहनी, कालिका र राप्ती नगरपालिकाका कही वडामा सर्वसम्मत उम्मेद्वार छनोट भएका छन् । ३ गते क्षेत्रले टुङ्ग्याएर ७ गते जिल्लाले सिफारिस गर्छ ।” कांग्रेसमा प्रमुख र उपप्रमुख पदका लागी आकाङ्क्षी धेरै भएकाले समस्या परेको हो । यसअघि कांग्रेसमा भरतपुर महानगरको प्रमुखमा मात्रै २२ जनाको नामावली आएको थियो ।

नेकपा (एमाले) मा पनि यस्तै सकस छ । हालका अध्यक्ष तथा सांसद कृष्णभक्त पोखरेलले चैत २८ सम्ममा उम्मेद्वार छनोट टुङ्ग्याउने बताए पनि अझै टुङ्गो लागेको छैन ।

एमालेका जिल्ला सचिव तेजेन्द्र खड्काले गाउँ र नगरका वडाहरूबाट सिफारिस आए पनि निर्णय गर्न बाँकी रहेको बताउँछन् । तर नगर प्रमुख र उपप्रमुखको उम्मेद्वारी भने वैशाख ७ गतेभित्र टुङ्ग्याउने खड्काले बताए ।

नेकपा (माओवादी केन्द्र) लाई पनि आकाङ्क्षी बढेकाले सकस भएको छ । चैत ५ र २६ भित्र उम्मेद्वार छान्ने घोषणा गरेपनि अझै टुङ्गो लागेको छैन । जिल्ला नेता घनश्याम दाहालले वैशाख ३ गते वडा तहको टुङ्ग्याउने गरी काम भइरहेको उल्लेख गर्नुहुन्छ ।

राष्ट्रिय प्रजातन्त्र पार्टीले समेत आफ्नो उम्मेदवार छान्ने प्रक्रिया तीव्र पारेको छ । जिल्ला अध्यक्ष बद्री तिमिल्सिनाले उम्मेदवार छनोट प्रक्रियाअन्तिम चरणमा पु¥याएको बताए । तर राप्रपाले पनि वडाको समेत उम्मेद्वारी तय गर्न सकेको छैन ।

चितवनमा अहिले भरतपुर महानगरपालिकासहित रत्ननगर, खैरहनी, राप्ती, कालिका नगरपालिका छन् भने इच्छाकामना गाउँपालिका छन् । ७ स्थानीय तहमा सात प्रमुख र सातजना उपप्रमुख, ९८ वडका ९८ वडा अध्यक्ष र ३ सय ९२ सदस्य गरि कुल ५ सय ४ जनप्रतिनिधीका लागी निर्वाचन हुँदैछ । रासस

प्रतिक्रिया दिनुहोस्