सल्लेरी— सोलुखुम्बु, १० कात्तिक । सामुदायिक रेडियो सोलु एफएमले देउसी भैलोबाट संकलन भएको रकम फोहोर व्यवस्थापनमा खर्च गर्ने भएको छ । प्रदेश नं १ कै पहिलो सामुदायिक रेडियोले नगरपालिकाको मुख्य चुनौती फोहोर व्यवस्थान देखिएकाले फोहोर संकलनका लागि टोकरी राख्ने भएको हो ।
नगरपालिकाको ३० वटा सार्वजानीक स्थानमा फोहोर फालिने टोकरी राखिने सो एफएम सञ्चालक समितिका अध्यक्ष बुद्धिनारण श्रेष्ठले जानकारी दिए । सल्लेरीमा सञ्चालन गरिएको देउसी भैलोबाट एक लाख ६८ हजार संकलन भएको छ ।
“पर्यटकीय महत्व बोकेको जिल्ला भएकाले सरसफाइमा विशेष ध्यान दिन आवश्यक छ” उनले भने । स्थानीय स्रोत साधनलाई प्रयोग गर्ने उद्देश्यले बेत बाँसबाट बनेको टोकरी राख्ने निर्णय गरिएको हो ।
पछिल्लो समय नगरपालिकाको बजार क्षेत्रमा जताततै फोहोरको मात्रा बढ्दै गएपछि चिन्ता व्यक्त गरिँदै आएको थियो । फोहोर संकलनका लागि पर्याप्त टोकरी राख्न नसक्दा प्लास्टिकजन्य फोहोरको मात्रा बढेको हो ।
टोलसुधार समितिले सरसफाइ गरे पनि सर्वसाधारणको चहलपहल रहने क्षेत्रमा फोहोर राख्ने टोकरी नहुँदा समस्या भएको हो । दुई वर्षभित्र सफा सोलुखुम्बु बनाउने लक्ष्य रहेको अध्यक्ष श्रेष्ठको भनाइ छ ।
रासस
प्रतिक्रिया ०
यो समाचारबारे तपाईंको धारणा लेख्नुहोस्। सभ्य र सम्मानजनक भाषा प्रयोग गर्नुहोस्।
अहिलेसम्म प्रतिक्रिया आएको छैन। पहिलो प्रतिक्रिया तपाईंको होस्।