१२ असोज पाल्पा । पाल्पाको रम्भा गाउँपालिका–४ हुँमिनका वडा सचिवले चेक बोकेर सम्पर्कविहीन भए पछि बृद्धबृद्धा, अपांग, एकल महिलालगायतका लाभग्राहीले सामाजिक सुरक्षा भत्ता पाउन सकेका छैनन् ।
वडा सचिव प्रेम नेपालीले असोज ९ गते भत्तावापतको करिब १७ लाख रुपैयाँको चेक बोकेर कार्यालयको सम्पर्कमा नआएको वडाध्यक्ष भोजबहादुर विश्वकर्माले बताए । गाउँपालिकाबाट चेक बुझेपछि पटकपटक फोन गर्दासमेत सचिवले अध्यक्षको फोन उठाएका छैनन् । असोज १० गतेसम्म अध्यक्षको फोन नउठेपछि दशैँमा ज्येष्ठ नागरिक, एकल महिला तथा दलित बालबालिकाले भत्ता बुझ्न पाएका छैनन् ।
भत्ता दिन नसकेपछि वडा कार्यालयमा आएका लाभग्राहीलाई रित्तै फर्काउन बाध्य भएका छन् । हुमिनकी ८६ वर्षीया जमुना श्रेष्ठले दशैंअघि भत्ता बुझ्न पाएको भए राहत महशुस गर्ने बताइन् ।
सरकारी मोटरसाइकलसमेत लिएर गएका सचिव सम्पर्कमा आएका छैनन् ।रम्भा गाउपालिका–४, हुमिनमा १ सय ३० जना ज्येष्ठ नागरिक, ५७ जना एकल महिला, ५२ जना ज्येष्ठ दलित र ४५ जना दलित बालबालिका छन् । रासस
प्रतिक्रिया ०
यो समाचारबारे तपाईंको धारणा लेख्नुहोस्। सभ्य र सम्मानजनक भाषा प्रयोग गर्नुहोस्।
अहिलेसम्म प्रतिक्रिया आएको छैन। पहिलो प्रतिक्रिया तपाईंको होस्।