गोरखाको गण्डकी गाउँपालिकाले दिगो विकासको लागि दिर्घकालिन लक्ष्य निर्धारण गर्ने भएको छ । पर्यावरणीय लोकतन्त्रका लागी दक्षिण एसियाली संवाद (सोडेक) र राष्ट्रिय जनवकालत मञ्च, नेपाल (नफान) ल आयोजना गरेको कार्यक्रममा यस बिषयबारे छलफल भएको छ ।
गण्डकी गाउँपालिकाको भूम्लिचोकमा योजना निर्माण र दिगो विकास सम्वन्धमा नव निर्वाचित पदाधिकारीहरू,सरकारी कर्मचारी, शिक्षक, दलका प्रतिनिधीहरू बीच छलफल भएको छ । कार्यक्रममा काठमाण्डौं विश्वविद्यालयका डा. उद्धव प्याकुरेलले कार्यपत्र प्रस्तुत गर्दै सामाजिक, वातावरणीय र आर्थिक पक्षको सुक्ष्म विश्लेषण गरेर मात्रै गाउँपालिकाको योजना निर्माण गर्नु पर्नेमा जोड दिए ।
नफानका अध्यक्ष भोला भट्टराईले दुरदृष्टि र योजना तर्जुमाबारे खाका प्रस्तुत गर्दै गाउँपालिकामा उपलब्ध स्रोत साधनको अवस्था संकलन गर्नुपर्ने बताए । खाकामा प्रोफाइल तयारी, विकासको समस्या, दिर्घकालिन तथा अल्पकालिन योजना, लागत र अनुगमन÷मुल्यांकनका विविध पक्षहरु समेटिएको थियो ।
वडास्तरसम्म जानकारी प्रवाह र क्षमता विकास आवश्यक भएको वडाध्यक्ष नवराज श्रेष्ठले बताए । स्थानीयस्तरमा सेवाप्रवाह र क्षमता विकासमा सेडेडले कार्यक्रम आयोजना गर्दै जाने सोडेकका प्रतिनिधि योगेन्द्र विजय दाहालले बताए ।
कार्यक्रममा कृषक, शिक्षक, दलीय प्रतिनीधि जनप्रतिनिधिहरूले गण्डकी गाउँपालिकाले शिक्षा,स्वास्थ्य, वन, कृषि,यातायात, भौतिक संरचना,खानेपानी आदि विषयगत योजना निर्माण गर्दा ध्यानदिनु पर्ने विषयहरु वारे धारणा राखेका थिए ।
प्रतिक्रिया ०
यो समाचारबारे तपाईंको धारणा लेख्नुहोस्। सभ्य र सम्मानजनक भाषा प्रयोग गर्नुहोस्।
अहिलेसम्म प्रतिक्रिया आएको छैन। पहिलो प्रतिक्रिया तपाईंको होस्।