डोटीका दिपायल सिलगढी बाहेक सबै स्थानीय तह दमकल बिहीन

माघ १, डोटी । डोटीको दिपायल सिलगढी नगरपालिका बाहेक सबै स्थानीय तहमा बारुणयन्त्र (दमकल) बिहीन रहेका छन् । डोटी जिल्लाका आठ स्थानीय तह दमकल विहीन रहेका छन् ।

जिल्लाका शिखर नगरपालिका र केआइसिंह, जोरायल, बोगटान, बडिकेदार, पूर्वीचौकी, सायल र आदर्श गाउँपालिकामा दमकलको अभावमा आकस्मिक रुपमा आगलागी हुँदा आगो निभाउन समस्या भएको स्थानीय बासिन्दा बताउँछन् ।

गाउँपालिकाले अत्यावश्यक चिज दमकल किन्नुको साटो बरु डाँडाकाँडा भत्काउनका लागि डोजर किन्ने होडबाजी गरिरहेको बोगटान गाउँपालिकाका स्थानीयवासी रमेश बुढाले बताए ।

जोरायल गाउँपालिकाका अध्यक्ष दुर्गादत्त ओझाले बजेट अभावमा दमकल किन्न नसकेको बताए । उनी भन्छन्, “कतिपय गाउँमा सडकनै पुगेका छैनन् दमकल किनेर के काम बरु डोजर किने त सडक खनिन्छ र बाटो पु¥याइन्छ ।” रासस