Logo

आधुनिक कृषि उपकरण तर्फ आकर्षित मोरङका किसान



पुस १४, विराटनगर । पराम्परगत रूपमा हलो जोतेर खेती गर्दै आएका मोरङका किसानहरूले अहिले आधुनिक उपकरण प्रयोग गर्न थालेका छन् ।

जिल्लाका १७ स्थानीय निकायले कृषिलाई महत्व दिनाका साथै आधुनिक उपकरणमा जोड दिएकाले गोरु लगाएर धान दाउनी गर्ने समस्या समेत अन्त्य भएको छ । खनजोतका लागि सहज र उत्पादनसमेत वृद्धि हुनथालेकाले कृषकहरू यसतर्फ आकर्षित भएका हुन् ।

सङ्घीय र स्थानीय सरकारले आफ्नो नीति तथा कार्यक्रम र बजेटमार्फत किसानलाई सिँचाइ गर्न, खेत जोत्न, मकै छर्न, धान रोप्न र धान काटनका लागि आधुनिक उपकरणमा अनुदान दिएकाले परम्परागत कृषि औजार लोप हुँदै गएका छन् ।

ठूलो आकारका उपकरणले एक घण्टामा दुई बिघा धान काट्नाका साथै धान दाउनीसमेत गर्ने भएकाले अहिले खेतबाटै किसानले घरमा धान भित्र्याउने गरेका छन् ।

रङ्गेली नगरपालिका–४ का किसान शिवराम मण्डलले विगतका वर्षमा खेतीबाट धान भित्र्याउन दुई हप्ता लाग्ने गरेकामा यस वर्ष आधुनिक उपकरणको प्रयोग गरेका कारण धान काटेको दुई घण्टामै घर भित्र्याइएको र धान काट्न मजदूर नपाउने समस्या पनि टरेको बताए ।

सुनवर्सी नगरपालिकाका प्रमुख कालीप्रसाद दासले कृषि उत्पादत वृद्धि गर्न र यस पेशाप्रति आकर्षित गराउन नगरपालिकाले बजेट छुट्याएर कृषि यान्त्रिकरणमा जोड दिएको बताए । रङ्गेली नगरपालिकाले पनि समूह बनाएर किसानलाई आधुनिक उपकरण खरिदमा अनुदान उपलब्ध गराएको छ ।

उक्त नगरपालिकाका अधिकृत कृष्णप्रसाद भट्टराईले वडा नं ४ र ५ किसानलाई समूह बनाएर दुई धान काट्ने उपकरण उपलब्ध गराएको बताए । रासस

प्रतिक्रिया दिनुहोस्