७ असार, खोटाङ । दिक्तेल रुपाकोट मझुवागढी नगरपालिकाभित्र पर्ने दिक्तेल–पाथेका सडकखण्डको विभिन्न ठाउँमा पहिरो जाँदा यातायात सेवा अवरुद्ध भएको छ ।
गत जेठ ३० गते राति परेको भारी वर्षासंगै उक्त सडकखण्डको चार स्थानमा झरेको पहिरो हालसम्म हटाउन नसक्दा यातायात सेवा अवरुद्ध हुनाका साथै पैदल यात्रुलाई समेत सास्ती भएको हो ।
ढुंगेचौतारा–हरेलोडाँडा–पाथेका हुँदै फेदकोसम्म १६ किलोमिटर सडक पहिरोका कारण जङ्गल नै बगाएर सडकमा थुपारिदिएपछि पैदल यात्रुलाई समेत बाटो छिचोल्नु समस्या भएको हो ।
डिटिएमपीअन्तर्गत २०६९ सालदेखि सञ्चालन भएको सो सडक पहिरोले अवरुद्ध भएपछि मोटरसाइकललगायत सबै प्रकारका सवारीसाधन बन्द भएको वडाध्यक्ष मगाधन राईले बताए ।
पहिरोका कारण साविकको फेदी, खार्ताम्छा, पाथेका, बाक्सिला, बास्पानी लगायतका यात्रुलाई सदरमुकाम हुँदै काठमाडौं आवतजावत गर्न समस्या भएको छ । लगातारको वर्षाका कारण जिल्लाका अधिकांश ग्रामीण सडक अवरुद्ध भएका छन् ।
रासस
प्रतिक्रिया ०
यो समाचारबारे तपाईंको धारणा लेख्नुहोस्। सभ्य र सम्मानजनक भाषा प्रयोग गर्नुहोस्।
अहिलेसम्म प्रतिक्रिया आएको छैन। पहिलो प्रतिक्रिया तपाईंको होस्।