Logo

सीतापुर बजारको स्वरुप फेरिँदै



 

२९ जेठ, लहान । अतिक्रमित र कुरुप बजारको रुपमा परिचित सिरहाको लक्ष्मीपुर पतारी गाउँपालिका– ६ सीतापुर बजार अहिले आफ्नो पहिचान फेर्न लागेको छ ।

सम्बन्धित निकायको उपेक्षाका कारण कुरुप बनेको सीतापुर बजारको स्वरुप स्थानीय तहमा जनप्रतिनिधि आएसंगै फेरिन लागेको हो । सडक अतिक्रमण गरी स्थानीयवासीले घर र पसल बनाउनुका साथै जथाभावी रुपमा फोहोर फाल्न थालेपछि कुरुप बनेको हो ।

सीतापुर गाउँपालिका–६ का वडाध्यक्ष राजेश्वर साह सुडीले सीतापुर बजारस्थित आफ्नो घर र पर्खाल भत्काएर सडक अतिक्रमण हटाउने अभियान शुरु गरेका हुन् । स्थानीयवासीले पनि सडकमा पर्ने आफ्नो पर्खाल र घर आफै भत्काउन थालेका छन् ।

जनप्रतिनिधि आएसंगै गणेशपुर–सीतापुर–नर्गी सम्मको सो सडकलाई २२ फिटबाट ३४ फिटको बनाउन थालिएपछि बजार फराकिलो र सुन्दर बन्न लागेको छ । चालु आर्थिक वर्ष २०७४÷७५ को वडास्तरीय योजना अन्तर्गत उक्त सडकको दुई किलोमिटरसम्मको सडक स्तरोन्नतिसंगै माटो र ग्राभेलको काम धमाधम भइरहेको स्थानीयवासी पप्पु यादव बताउछन् ।

सडक साँघुरो हुँदा यातायातका साधन आवागमनमा असहज हुनुको साथै दुर्घटना हुँदै आएको थियो । दुई दशकसम्म जनप्रतिनीधि नहुँदा विकास निर्माण ठप्प भएको थियो । जनप्रतिनिधि आएपछि गाउँपालिकामा विकासको लहर सिर्जना भएको स्थानीयवासी शंकर साहको भनाइ छ ।

“सडक, नाला र बिजुलीबत्ती लगायत पूर्वाधारको विकासमा गाउँपालिका र वडा कार्यालय लागिपरेका छन्,” साहले भने । लहान नगरपालिकादेखि करीब ५ किलोमिटरको दुरीमा सीतापुर बजार पर्छ । वडास्तरी विकास योजनाबाट सडक स्तरोन्नति र नाला निर्माणको काम भइरहेको छ ।
रासस

प्रतिक्रिया दिनुहोस्