Logo

निर्वाचनमा सुदृढ सुरक्षा व्यवस्था मिलाउन निर्देशन



प्रधानमन्त्री पुष्पकमल दाहालले स्थानीय तहको निर्वाचन भयरहित वातावरणमा सम्पन्न गर्न शान्ति सुरक्षाको सुदृढ तथा भरपर्दो व्यवस्था मिलाउनुपर्नेमा जोड दिएका छन् ।

आफूलाई भेट्न प्रधानमन्त्री निवास पुगेका प्रहरी महानिरीक्षक प्रकाश अर्याललाई शान्ति सुव्यवस्था कायम गर्न प्रहरी सङ्गठनलाई अझ चनाखो भई लाग्न प्रधानमन्त्रीले निर्देशन दिएको प्रधानमन्त्रीको निजी सचिवालयले जनाएको छ ।

स्थानीय तह निर्वाचन घोषणा भइसकेकाले त्यसमा केन्द्रित रहेर शान्ति सुरक्षा कायम गर्दै मौजुदा ऐन कानुनले सुम्पेको जिम्मेवारी इमान्दार र निष्पक्ष भएर निर्वाह गर्न प्रधानमन्त्रीले प्रहरी प्रमुखलाई निर्देशन दिएका थिए । अर्याललाई सरकारले सोमबार साँझ प्रहरी महानिरीक्षकमा नियुक्त गरेको हो ।

‘सेनालाई निर्वाचनमा प्रयोग गरिन्न’

निर्वाचन आयोगका आयुक्त नरेन्द्र दाहालले निर्वाचनसम्बन्धी व्यवस्थापकीय कार्य तीव्र गतिमा भइरहेको बताए ।

यहाँ आज पत्रकारसँगको भेटघाटमा उनले मतदाता परिचयपत्र र मतपत्र छपाइलगायत, निर्वाचन प्रशिक्षणको काम अन्तिम चरणमा पुगेको जानकारी दिए । राजनीतिक समस्या समाधान हुनेमा उनी विश्वस्त थिए ।

प्रदेश नं २ का जनता पनि निर्वाचनको पक्षमा उत्साहित देखिएको र केही दिनमै त्यहाँ मतदाता शिक्षालगायत कार्यक्रम सञ्चालन गरिने जानकारी दिए । उनले एकै चरणमा निर्वाचन गर्ने तयारी रहेको र सेनालाई निर्वाचनमा प्रयोग नगरिने बरु ‘ब्याक फोर्स’का रूपमा नराख्ने स्पष्ट पारे । रासस

प्रतिक्रिया दिनुहोस्