२० चैत, भीमदत्तनगर ।
खानेपानी मन्त्री बिना मगरले कञ्चनपुरको दक्षिण क्षेत्रमा निर्माणाधीन डाकेबजार–दैजी हुलाकी सडक तीव्र गतिमा निर्माण गर्न निर्देशन दिएकी छन् ।
मन्त्री मगरले बेलौरी नगरपालिकामा हुलाकी सडक आयोजना कार्यालय धनगढीका कर्मचारी र निर्माण व्यवसायीसंग छलफल गर्दै सडक निर्माणको काममा ढिलासुस्ती नगर्न आग्रह समेत गरिन् ।
मन्त्री मगरले स्थानीयवासीलाई सास्ती नहुने गरी सडक निर्माणमा तीव्रता दिन सम्बन्धित पक्षलाई निर्देशन दिइन् । कञ्चनपुरको दक्षिणी क्षेत्रको दैजी–बेल्डाँडी–बेलौरी–डोकेबजार हुलाकी सडकखण्ड निर्माणमा ढिलासुस्ती भइरहेको भन्दै मन्त्रीसमक्ष स्थानीयवासीले गुनासो गरेका थिए ।
उनले आगामी असारसम्म गर्न सकिने कामको विवरण, सडकमा धुलो र हिलो हुन नदिने उपायका बारेमा समेत छलफल गरेकी थिइन् । असारसम्म माटो भर्ने र ग्राभेलिङको आधा काम गर्न सकिने निर्माण व्यवसायीले मन्त्रीसमक्ष जानकारी गराएका थिए ।
निर्माण व्यवसायीले बजेटको समस्या र शुक्लाफाँटा राष्ट्रिय निकुञ्ज क्षेत्रमा काम गर्न भइरहेको अवरोधबारे गुनासो पोखेका थिए । जवाफमा मन्त्री मगरले काम गर्ने वातावरण बनाउने प्रतिबद्धता समेत व्यक्त गरिन् ।
कञ्चनपुर निर्वाचन क्षेत्र १ बाट प्रतिनिधिसभा सदस्यमा निर्वाचित मगरमन्त्री भएपछि पहिलोपटक गृह जिल्ला आएर विभिन्न कार्यक्रममा व्यस्त रहेकी छन् ।
त्यसैगरी शुक्लाफाँटा निकुञ्ज विस्थापित बस्तीमा पुगेर मन्त्री मगरले विस्थापितको दीर्घकालीन समाधान खोज्न आफू पहल गर्ने बताइन् । यहाँको लालझाडी गाउँपालिका ६ ढक्कास्थित विस्थापित शिविरमा लगाइएको गहुँखेती भित्र्याउन निकुञ्ज प्रशासनले अवरोध गरेको भन्दै विस्थापितले समस्या समाधान गरिदिन आग्रह गरेका थिए ।
मन्त्री मगरले गहुँ भित्र्याउने समस्या तत्काल समाधान गर्न वन मन्त्रालयसित समन्वय गरिसकेको बताइन् ।
रासस
प्रतिक्रिया ०
यो समाचारबारे तपाईंको धारणा लेख्नुहोस्। सभ्य र सम्मानजनक भाषा प्रयोग गर्नुहोस्।
अहिलेसम्म प्रतिक्रिया आएको छैन। पहिलो प्रतिक्रिया तपाईंको होस्।