२७ फागुन, बाबियाचौर– म्याग्दी ।
बेनी नगरपालिका ३ भकिम्लीका बासिन्दाले श्रमदान गरेर सडक स्तरोन्नति गरेका छन् । दूधेखोला–भकिम्ली सडक स्तरवृद्धिका लागि बेनी नगरपालिकाले सञ्चालन गरेको सो अभियान अन्तर्गत उपभोक्ताले ग्याबिन जाली लगाउने, निर्माण सामग्री ढुवानी र सडक ढलान गर्ने कामका लागि श्रमदान गरेका हुन् ।
घुम्ती सुधार गर्ने, फराकिलो बनाउने, ग्रेड मिलाउने लगायत काममा डोजर प्रयोग गरेपनि ग्याबिन पर्खाल लगाउने र ढलान गर्ने काममा श्रमदान गरिएको उपभोक्ता समितिका अध्यक्ष भानुभक्त थापाले जानकारी दिए । बेनी नगरपालिकाले २४ लाख १२ हजार बजेट विनियोजन गरेको छ । उपभोक्ताले ४ लाख २८ हजार बराबरको श्रमदान गरेका छन् ।
हल्लेगौंडा, चिनाखेत, डाँडाखानी, पानीस्वाँरा, कोप्रे र ज्यामिरेका बासिन्दाले प्रतिघरधुरी एक दिनका दरले श्रमदान गरेका छन् । सडक स्तरोन्नति गर्ने काम अन्तिम चरणमा पुगेको अध्यक्ष थापाले बताए ।
हल्लेगौंडाको भिरमा ८४ मिटर सडक ढलान गर्ने काम भइरहेको छ भने ५४ थान ग्याबिन जाली लगाइसकिएको छ । जनप्रतिनिधिको समन्वय, नियमित अनुगमन, उपभोक्ता समितिको सक्रियता र समुदायको जनसहभागितामा गत पुस १ गते सम्झौता भएको सो योजना निर्धारित समयमै सम्पन्न हुने वडाध्यक्ष पदम पुनले बताए ।
विसं २०६६ मा दूधेखोलादेखि हल्लेगौंडा, पानीस्वाँरा डाँडाखानी हुँदै डोले पु¥याइएको दूधेखोला भकिम्ली सडकको लम्बाइ १३ किलोमिटर छ । तत्कालीन जिविसको पाँच लाख, भकिम्ली गाविसको दश लाख र उपभोक्ताको नौ लाख लगानीमा ट्र्याक खोलिएको हो । बजेट अभावका कारण सडकको मर्मत हुनसकेको थिएन ।
महेन्द्र माविको भवन निर्माण
रघुगंगा गाउँपालिका ५ झिँस्थित महेन्द्र माविको नयाँ भवन निर्माण गरिएको छ । आन्तरिक स्रोत र समुदायको श्रमदान गरी ६४ लाखको लागतमा तीन तले छ कोठे पक्की भवन निर्माण गरिएको प्रधानाध्यापक याम गर्बुजाले जानकारी दिए ।
भवन निर्माणका लागि जिल्ला शिक्षा कार्यालयले ३२ लाख, साविक झिँ गाविसले १० लाख र रघुगंगा गाउँपालिकाले पाँच लाख उपलब्ध गराएका थिए । विद्यालयको आन्तरिक स्रोत र जनश्रमदान गरी १७ लाख लगानी भएको छ । विद्यालयमा २६० भन्दा बढी विद्यार्थी अध्ययनरत छन् ।
रासस
प्रतिक्रिया