२६ फागुन, बागलुङ वर्षौंसम्म अलपत्र बागलुङ बसपार्क निर्माणको काम अघि बढ्ने भएको छ । बसपार्क निर्माणका लागि बागलुङ नगरपालिका र नगर विकास कोषबीच शुक्रबार ऋण सम्झौता भएको छ । केही अनुदान र केही ऋण उपलब्ध गराउने गरी सम्झौता भएको बागलुङ नगरपालिकाका प्रमुख जनकराज पौडेलले बताए १० करोड ४६ लाख रुपैयाँको लागतमा निर्माण हुने बसपार्कका लागी ९ करोड चार लाख ३९ हजार ऋण उपलब्ध गराउने छ ।
सरकारको तर्फबाट ७५ लाख ३६ हजार रुपैयाँ ऋण र नगरपालिकाको समपूरक कोषबाट २५ लाख १२ हजार रुपैयाँ बेर्होने सम्झौता भएको छ । यस्तै अनुदानतर्फ जर्मन विकास बैंकबाट १० लाख रुपैयाँ, नेपाल सरकारबाट १८ लाख ८९ हजार रुपैयाँ र नगरपालिका समपूरक कोषबाट १३ लाख रुपैयाँ विनियोजन गरिनेछ ।
राष्ट्रिय सडक सञ्जालमा जोडिएको २५ वर्ष बित्दासमेत बागलुङमा व्यवस्थित बसपार्क बन्न सकेको थिएन । बसपार्क बनाउन स्थानीयवासीले ७० करोड पर्ने जग्गा निःशुल्क उपलब्ध गराउँदा पनि बसपार्क बनाउने योजना अवरुद्ध हुँदै आएको थियो । तीन वर्षअघि स्थानीयवासीले साढे १७ रोपनी जग्गा नगरपालिकालाई हस्तान्तरण गरेका थिए ।
मध्यपहाडी लोकमार्ग र कालीगण्डकी करिडोरको समेत केन्द्र रहेको बागलुङमा व्यवस्थित बसपार्कको आवश्यकता खड्किँदै आएको छ । अहिले बागलुङ नगरपालिका–३ चिप्लेटीमा अव्यवस्थितरुपमा अस्थायी बसपार्क सञ्चालित छ । रासस
प्रतिक्रिया