Logo

प्रतिस्पर्धीलाई कमजोर देखाएर चुनाव जित्ने प्रयासमा उम्मेदवार



सञ्चिता घिमिरे
१८ मंसिर, ललितपुर ।
प्रतिनिधिसभा र प्रदेशसभाको निर्वाचन नजिकिँदै गर्दा उम्मेदवारहरु आफ्ना प्रतिस्पर्धीका कमीकमजोरी ओकल्दै निर्वाचन जित्ने होडमा छन् । क्षेत्र नं १ मा प्रतिनिधिसभातर्फ कांग्रेसबाट अर्थ राज्यमन्त्री उदयशम्शेर राणा र वाम गठबन्धनबाट एमालेका नवराज सिलवाल उम्मेदवार छन् ।

राणा २०७० को संविधानसभा निर्वाचनमा यस क्षेत्रबाट निर्वाचित भएका थिए । राणाले आफ्ना प्रतिद्वन्द्वी सिलवाललाई यस क्षेत्रलाई नचिनेको आरोप लगाउने गरेका छन् । “न त यहाँको भूगोल चिन्नुभएको छ, न यहाँ कहिले आउनुभएको नै थियो,” राणाले भने । गोदाबरी बाहेक अन्यत्रका मतदाताले सिलवाललाई नचिन्ने उनको आरोप छ ।

सिलवाल क्षेत्र नं १ को गोदाबरीको तथा राणा क्षेत्र नं ३ कुपण्डोलको बासिन्दा हुन् । सिलवालले भने, “म यसै क्षेत्रमा जन्मे हुर्किएको हो, त्यसैले आफ्नो क्षेत्रमा नै उम्मेदवार भएको छु ।” राणाले अघिल्लो निर्वाचनमा दिएको आश्वासन पूरा गर्न नसकेको उनको आरोप छ । राणाले संविधानसभा निर्वाचनका बखत गरेका प्रतिबद्धता पूरा नगरेको उनको भनाइ छ ।

उम्मेदवार एक अर्कालाई आरोप लगाउनमै ब्यस्त छन् । आफू सक्षम भएको देखाएर मतदातालाई आकर्षित गर्न लागेका छन् । बागमति, कोञ्जेसोम र महांकाल गाउँपालिका तथा गोदावरी नगरपालिकाको १२ वडा यस क्षेत्रमा पर्छ । स्थानीय तहको निर्वाचनमा तीन गाउँपालिका अध्यक्ष र उपाध्यक्षमध्ये नेपाली कांग्रेस, नेकपा एमाले र नेकपा माओवादी केन्द्र एक एकमा विजयी भएका थिए । गोदावरी नगरपालिकाको प्रमुख र उप–प्रमुखमा कांग्रेसका उम्मेदवार विजयी भएका थिए ।

यस क्षेत्रमा विसं २०४८, २०५१ र २०५६ मा भएको निर्वाचनमा एमाले विजयी भएको थियो । विसं २०६४ मा नेकपा माओवादी विजयी भएको थियो भने २०७० मा कांग्रेस उम्मेदवार राणा विजयी भएका थिए ।

क्षेत्र नं १ मा ५३ मतदानस्थल र ८७ वटा मतदान केन्द्र छन् । कुल मतदाता संख्या ६५ हजार ९१८ रहेको छ । प्रतिनिधिसभा सदस्यका लागि १२ वटा राजनीतिक दलका तर्फबाट र नौ जना स्वतन्त्र गरेर २१ जनाको उम्मेदवारी परेको जिल्ला निर्वाचन कार्यालयले जनाएको छ । प्रदेश क मा छ वटा राजनीतिक दलका तर्फबाट र दुईजना स्वतन्त्र गरेर आठ जना तथा प्रदेश ख मा आठ राजनीतिक दल र चारजना स्वतन्त्र गरेर १२ जना उम्मेदवार चुनावी मैदानमा छन् ।
रासस

प्रतिक्रिया दिनुहोस्