२५ कात्तिक, कञ्चनपुर ।
शुक्लाफाँटा नगरपालिकामा जनप्रतिनिधि आएको पाँच महिनापछि न्यायिक समिति गठन गरिएको छ । समितिमा पठाउने पदाधिकारीबारे सहमति जुट्न नसकेपछि लामो समयसम्म समिति गठनमा विलम्ब हुँदै आएको थियो ।
निर्वाचन पद्धतिद्वारा नै भए पनि समितिलाई पूर्णता दिने सोच अघि सार्दै डाकिएको कार्यपालिका बैठकमा सहमति जुटेपछि न्यायसमितिले पूर्णता पाएको नगरप्रमुख दिलबहादुर ऐरले बताए ।
उनका अनुसार नगरपालिकाका उपप्रमुख तुलसी हमालको संयोजकत्वमा शुक्रबार साँझ अबेर तीन सदस्यीय न्यायिक समिति गठन गरिएको छ । समितिका सदस्यमा उत्तरदेव भट्ट र परमानन्द जोशी चयन भएका छन् ।
समितिले पूर्णता नपाउँदा विवाद र मुद्दालाई नगरपालिकाले प्रहरी, अर्धन्यायिक निकाय र मेलमिलाप केन्द्रमा पठाउँदै आएको थियो । समिति गठनपछि सर्वसाधारणले ल्याएका विवादको छिनोफानो अबदेखि नगरपालिकामै गरिने भएको छ । स्वच्छ र निष्पक्ष तरिकाले समितिमा आएका विवाद र मुद्दाको किनारा लगाउन जीत जीतको भावनालाई अनुसरण गरिने समितिका सदस्य जोशीले बताए ।
रासस
प्रतिक्रिया