२ पुस २०८२, बुधबार | Thu Dec 18 2025

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

नौकुण्ड गाउँपालिकाका ग्रामीण सडक मार्ग सुधार शुरु



 

ज्ञानेन्द्र न्यौपाने
असोज १७, रसुवा ।

वर्षाका कारण नौकुण्ड गाउँपालिकाका अवरुद्ध ग्रामीण सडक पुनः जोडिने भएको छ । नौकुण्ड गाउँपालिका अध्यक्ष नुर्पुसाङ्मो घलेका अनुसार गाउँपालिकाले गत वर्ष निर्माण गरेको ४८ किमी ग्रामीण सडक वर्षायामको भलपानीकै असरले ठाउँठाउँमा गएको पहिरो कारण अवरुद्ध भएकामा पुनःसञ्चालन गर्न तीन स्काभेटर परिचालन गरिएको छ ।

सडक यही असोज २७ गतेभित्र सफा गरी प्रत्येक गाउँमा यातायात सञ्चालन गरी सक्ने लक्ष्यका साथ द्रुत रुपमा मर्मत अगाडि बढिरहेको बताइएको छ । भाडाका स्काभेटर मध्यस्थकर्तामार्फत ल्याउँदा बढी व्ययभार पर्ने भएकाले गाउँपालिका आफैँले व्यवस्थापन गरी प्रतिघण्टा ४ हजार १५० का दरले सडकको अवरोध हटाउने काममा परिचालन भएको छ ।

सडकको अवरोध हटेपछि विकट सिङ्बन्दीदेखि ग्राङ्मर सम्मका गाउँमा यस वर्ष सडकबाटै दशैँका खाद्य सामग्री गाउँटोलमा सवारी साधनबाटै पुग्ने गाउँपालिका प्रमुख नुर्पुसाङ्मो तामाङले जानकारी दिए ।

२४ शिक्षक परिपूर्ति

गाउँपालिकाले आफ्ना क्षेत्रमा रहेका विद्यालयमा गुणस्तरीय शिक्षाका लागि २४ शिक्षक आवश्यकतानुसार करारमा परिपूर्ति गरिसकेको छ । शुद्ध खानेपानीको व्यवस्थापन, स्वास्थ्य संस्थाको सुदृढीकरण समेतका काम भइसकेको बताइएको छ । नौकुण्ड गाउँपालिकामा विद्यालय ३० वटा छन् ।

गाउँमा वृद्धवृद्धालाई उचित सम्मान गर्ने उद्देश्यले ज्येष्ठ नागरिकको यकिन लगतसमेत अद्यावधिक गर्ने कार्य शुरु गरिएको छ । गाउँपालिका क्षेत्रमा ७० बर्ष उमेर देखि माथिका करीब ८०० ज्येष्ठ नागरिक रहेको अनुमान गरिएको छ । हालसम्म १२५ जनालाई ज्येष्ठ नागरिक परिचयपत्र वितरण गरिसकिएको जनाइएको छ । लगत सङ्कलन गर्दै वितरण जारी राखिएको गाउँपालिका उपाध्यक्ष सिर्जना तामाङले बताइन् ।

विगतका समयमा ज्येष्ठ नागरिकको सुविधा वितरकले खायो भन्ने गुनासोलाई अन्त्य गर्दै अहिले ज्येष्ठ नागरिकको बैंक खातामार्फत भुक्तानी गर्ने प्रक्रिया अगाडि बढाइएको छ । परिचयपत्र वितरणछि ती ज्येष्ठ नागरिकलाई जाडोयाममा लगाइने कपडाको न्यानो झोला वितरण गर्ने कार्ययोजना समेत स्वीकृत भइसकेको उपाध्यक्ष तामाङले जानकारी दिए ।

छ वटा वडा रहेको नौकुण्ड अन्तर्गत बेताङ, सरस्युँ, खाल्चेत, बडरे, ठूलोभोर्ले, चित्ती घोर्मु, आरुखर्क, लाङ्बु, थाङ्दोर, सिङ्बन्दी, यार्सा, युब्रा, पारच्याङ, गुइसा, घिचेत, पाटीखर्क, सरमथली, दनुस्वाँरा र फाम्चेत सम्मका तीन दर्जन भन्दा बढी गाउँ रहेका छन् ।
रासस

प्रकाशित मिति : १७ आश्विन २०७५, बुधबार ००:००