Logo

बालबालिकालाई राजनीतिमा प्रयोग नगर्न जेड



पाल्पा, बालबालिकालाई राजनीतिक कार्यक्रममा प्रयोग गर्न नहुनेमा सरोकारवालाले जोड दिएका छन् । विभिन्न बहानामा बालबालिकालाई निर्वाचन प्रक्रियामा प्रयोग गरिएको भन्दै उनीहरुले यस्ता कार्यलाई तत्काल रोक्नुपर्ने धारणा व्यक्त गरें ।

शिक्षाका लागि राष्ट्रिय अभियान जिल्ला सञ्जाल पाल्पाले तानसेनमा आयोजना गरिएको कार्यक्रममा सहभागीहरुले विद्यालयलाई शान्ती क्षेत्र घोषणा गरिए पनि त्यसलाई व्यवहारिक रुपमा कार्यान्वयन गर्न नसकेकोमा दुःख व्यक्त गरे ।

विद्यालय परिसरमा राजनीतिक गतिविधि गर्दा बालबालिकामा नकारात्मक प्रभाव परेको छ, शिक्षाका लागि राष्ट्रिय अभियान सञ्जाल पाल्पाका सदस्य शालीकराम पाण्डेले भने, ‘स्थानीय तहको निर्वाचनमा बालवालिकालाई प्रयोग गर्न नहुनेमा समाजका सबै पक्ष सजग र सचेत हुनुपर्दछ ।’
कुनैपनि विद्यालयका विद्यार्थीलाई राजनितिक गतिविधिमा प्रयोग गर्ने वा विद्यालय क्षेत्रमा राजनीतिक कार्यक्रम गर्नेहरुलाई कारबाहीको माग गर्दै सहभागीहरुले जिल्ला शिक्षा कार्यालयमा पुगेर ज्ञापनपत्र बुझाएका थिए ।

यसैगरी जिल्लास्थित विभिन्न राजनीतिक पार्टीका कार्यालयमा पुगेर पनि उनीहरुले शान्ति क्षेत्र घोषणा गरिएको विद्यालयमा राजनीतिक गतिविधि नगर्न माग गरेको सदस्य पाण्डेले जानकारी दिए ।

सञ्जालका सहसंयोजक तथा इन्द्रेणी समाज पाल्पाका प्रमुख रुद्र मश्राङ्गीको अध्यक्षतामा भएको सो कार्यक्रममा विभिन्न सरकारी, गैरसरकारी कार्यालयका प्रमुख तथा प्रतिनिधि, पत्रकार, शिक्षक महासंघ तथा नागरिक समाज अगुवाहरूको सहभागिता थियो । रासस

प्रतिक्रिया दिनुहोस्