१३ बैशाख २०८१, बिहिबार | Thu Apr 25 2024

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

बलेवा विमानस्थल पुग्ने सडकको बेहाल



 

२१ जेठ, बागलुङ ।
बलेवा विमानस्थल पुग्ने सडकको अवस्था बेहाल छ । बन्द भएको २६ वर्षपछि विमानस्थल चले पनि सडककै कारण यात्रुलाई सास्ती छ । सदरमुकामदेखि १३ किमीको दूरीमा रहेको विमास्थल पुग्न मोटरमा डेढ घण्टा लाग्छ । वर्षा नलाग्दैको छिटफुट झरीले पनि सडक हिलाम्मे बनाउँछ । साँधुरोसँगै स्तरीय सडक नहुँदा विमानस्थल सम्मको आवातजावत कष्टपूर्ण बनेको छ ।

चालिस मिनेटको बलेवा–काठमाडौं हवाई यात्राका लागि बलेवा पुग्न कठिनाइ व्यहोर्नु परेको यात्रुको गुनासो छ । जतिसक्दो छिटो सडकको स्तरोन्नति र कालोपत्र गर्नुपर्ने माग उठेको छ । राष्ट्रिय गौरवको आयोजना कालीगण्डकी करिडोरमै पर्ने उक्त सडकखण्ड गत वर्षदेखि सञ्चालनमा आएको हो । सडकको मार्ग खोलिए पनि स्तरोन्नतिको काम हुन सकेको छैन । सडक सुधार नहुँदा विमानस्थल सञ्चालनमा प्रश्न उठ्ने गरेका छन् ।

बागलुङ नगरपालिकाको विशेष पहलमा गत चैतदेखि सञ्चालित विमानस्थलमा सातामा दुई उडान हुँदै आएका छन् । नगरपालिकाले विमानस्थल जोड्ने सडक स्तरोन्नति र कालोपत्र गर्न केन्द्रमा माग गर्दै आएको छ । नेपाली सेनाको कालीगण्डकी करिडोर निर्माण कार्यदलले भने सडक स्तरवृद्धिको काम गर्न बजेट अभाव रहेको जनाएको छ । कार्यदलले बागलुङ खण्डको सडकलाई १० मिटर चौडा गर्ने याजना बनाए पनि बजेट नहुँदा काम अघि बढेको छैन ।

बागलुङ नगरपालिकाका प्रमुख जनकराज पौडेलले सडकको स्तरवृद्धिका लागि बजेट जुटाउन पहल भइरहेको बताए । पूर्वाधारको सीमितता हुँदा पनि विमानस्थल सञ्चालन गर्नु ठूलो उपलब्धि भएको उनको भनाइ छ । “नगरपालिका आफैँले तत्काल सडक कालोपत्र गर्न सक्दैन,” उनले भने, “केन्द्र या प्रदेश सरकारबाट बजेट व्यवस्था हुनुपर्छ ।”

विमानस्थल सम्म पुग्नलाई प्रयोग गर्न सकिने थप चार किमी लामो मालढुङ्गा–कुश्मीसेरा कृषि सडकको पनि अवस्था उस्तै छ । दुवै सडकलाई गुणस्तरीय बनाउन नगरपालिका आफैँले नसक्ने भएपछि संघ र प्रदेश सरकारको मुख ताक्नुपर्ने अवस्था छ । बेलैमा सडक स्तरीय नबनाएसम्म विमानस्थल सञ्चालन प्रभावित हुन सक्ने देखिन्छ ।

कृषि सडकलाई कालोपत्र गर्ने गरी बजेट विनियोजनका लागि प्रदेश सरकारसंग माग गरेको प्रतिनिधिसभा सदस्य सूर्य पाठकले बताए । “प्रदेश सरकारसंग तत्काललाई विमानस्थल सम्म पुग्ने सडक कालोपत्रका लागि बजेटको माग गरेका छौँ,” उनले भने ।

सडक मात्र नभएर विमानस्थलका अन्य भौतिक पूर्वाधार पनि जीर्ण अवस्थामा छन् । कच्ची अवस्थामा रहेको धावनमार्ग कालोपत्र गर्न करीब १७ करोड लाग्ने बताइएको छ । विमानस्थलबाट नेपाल एयरलाइन्स र तारा एयरलाइन्सले आइतबार र बिहीबार सातामा दुई पटक उडान भर्दैआएका छन् ।
रासस

प्रकाशित मिति : २१ जेष्ठ २०७५, सोमबार ००:००