विकासले गति लिँदा बारावासी खुशी

१० जेठ, वीरगञ्ज
स्थानीय निकायको निर्वाचनपश्चात् स्थिर सरकार आउँदा विकास निर्माणले गति लिन थालेपछि बारावासी खुशी भएका छन् । दुई दशकपछि भएको स्थानीय निकायको निर्वाचनले स्थिर तथा ठोस सरकार दिँदा कहीँ नाला निर्माण हुँदैछ भने कहीँ सडक ढलानले तीव्रता पाउँदैछन् ।

विकास निर्माण द्रुत गतिमा हुन थालेपछि बाराको परवानीपुर गाउँपालिका रामपुर टोकनीका बिन्दु साहले खुशी व्यक्त गरिन् । दुई दशकसम्म विकास कार्य ठप्प भएको तर स्थानीय निकायको निर्वाचनपश्चात् गाउँगाउँमा विकास निर्माणको काम हुन थालेपछि उनी मात्र होइन जिल्लावासी खुशी व्यक्त गर्दै अब गाउँ शहरको मुहार फेरिने ढुक्क देखिन्छन् ।

अघिल्लो वर्षको मुसलेधारे वर्षाका कारण हिलोमा हिँड्न बाध्य भएकी बारा बुनियादकी उषा देवी गाउँमा सडक ढलान भइरहेकामा खुशी व्यक्त गर्दै भन्छिन् “अब हाम्रो गाउँको पनि मुहार फेरिने भएको छ ।”

परवानीपुर गाउँपालिका १ मा २२ लाखको लागतमा १४५ मिटर सडक निर्माण भइरहेको वडाध्यक्ष मिश्री महतोले बताइन् । उनले भनिन्, “हाम्रो लागि यो एउटा सुनौलो अवसर हो, विकासलाई प्राथमिकतामा राखेर काम अघि बढाएका छौँ ।” पूर्वाधारको अन्य विकाससँगै गाउँमा सडक र नाला निर्माणलाई प्राथमिकतामा राखेर विकास कार्यमा जुटेको उनको भनाइ छ ।

सो गाउँपालिका २ मा १५ लाख लागतमा नाला निर्माण, वडा नं ३ को परवानीपुर बजारक्षेत्रदेखि सातोमाई मन्दिरसम्म ६० लाखको लागतमा नाला निर्माण तथा वडा नं ४ मा ४० लाखको लागतमा सडक ढलान र नाला निर्माण भइरहेको गाउँपालिका अध्यक्ष हरिनारायण साहले बताए । योजना छनोटको समयमा गाउँवासीले दिएको सल्लाह सुझावअनुसार विकास निर्माणको कामलाई प्राथमिकतामा राखेर काम अगाडि बढाइएको उनको भनाइ छ ।

परवानीपुर गाउँपालिकामा २२ लाख ५० हजारको लागतमा नाला निर्माणको काम भइरहेको छ । गाउँपालिकामा नाला, सडक, विद्यालय भवन, धर्मशाला, मसानघाट लगायतको काम तीव्र रुपमा भइरहेको छ ।
रासस