गाउँपालिका महासंघको अध्यक्षमा होमनारायण श्रेष्ठ निर्वाचित (अन्य निर्वाचितहरूकाे सूचीसहित)

स्थानीय खबर संवाददाता
काठमाडौं, १९ चैत

गाउँपालिका राष्ट्रिय महासंघको अध्यक्षमा सिन्धुपाल्चोकको जुगल गाउँपालिकाका अध्यक्ष होमनारायण श्रेष्ठ सर्बसम्मत निर्वाचित भएका छन् । श्रेष्ठ एमालेको तर्फबाट निर्वाचित गाउँपालिका अध्यक्ष हुन् । श्रेष्ठसहित ३७ सदस्यीय महासंघको केन्द्रीय कमिटी सर्बसम्मत निर्वाचित भएको छ ।

शनिबारदेखि राजधानीमा चलेको महाअधिवेशनबाट उपाध्यक्षमा झापाको कमल गाउँपालिकाकी उपाध्यक्ष मेनुका काफ्ले निर्वाचित भएकी छन् । काफ्ले पनि एमालेको तर्फबाटै निर्वाचित भएकी उपाध्यक्ष हुन् । यसैगरि महासचिवमा सिन्धुपाल्चोक इन्द्रावति गाउँपालिकाका अध्यक्ष बंशलाल तामाङ निर्वाचित भएका छन् । तामाङ कांग्रेसको तर्फबाट निर्वाचित गाउँपालिकाका अध्यक्ष हुन् ।

यसैगरि सचिवमा धादिङ त्रिपुरासुन्दरी गाउँपालिकाकी उपाध्यक्ष देबी बुर्लाकोटी निर्वाचित भएकी छन् । बुर्लाकोटी कांग्रेसबाट निर्वाचित भएकी हुन् । यसैगरि कोषध्यक्षमा सल्यानको कमाखा गाउँपालिकाकी अध्यक्ष दिलमाया बुढामगर निर्वाचित भएकी छन् ।

एमालेमा सहज, कांग्रेसलाई सकस

एमालले आईतबार राति नै सबैजसो पदाधिकारीको नाम टुङ्गो लगाई सकेको थियो । केही दिन अघिदेखि जुगल गाउँपालिकाका अध्यक्ष अध्यक्ष होमनारायण श्रेष्ठ र स्याङ्जा कालीगण्डकी गाउँपालिकाको अध्यक्ष खिमबहादुर थापाको नाम चर्चामा थियो । स्पष्ट बोल्ने र स्थानीय शासनको बिषयमा पकड भएका श्रेष्ठ र थापा दुबै केपी ओली खेमाका कार्यकर्ता हुन् ।

श्रेष्ठ र थापामध्ये कसलाई अघि सार्ने भन्नेबारे पार्टीको उच्च स्रोतसँग पनि छलफल भएको थियो । पार्टीको उच्च स्रोतले श्रेष्ठलाई अघि सार्न सुझाव दिए पछि थापा पछि हटेका थिए । थापा पनि महासंघको केन्द्रीय सदस्यमा सर्बसम्मत निर्वाचित भएका छन् । एमालेमा सहज हुनुको कारण पदाधिकारीको संख्या पनि हो ।

कांग्रेसमा भने आकांक्षीहरू धेरै भए पनि पदाधिकारी छान्न सकस परेको थियो । आईतबार दिउँसो देखि नै सहमति गर्ने प्रयास गरे पनि सोमबार दिउँसो मात्रै टुङ्गो लगाएको थियो । सहमति जुटाउन नसकेपछि कांग्रेसका उच्च नेताहरूकहाँ बसेर नाम टुङ्ग्याएका थिए । माओवादी केन्द्र, संघीय फोरमलगायतका दलहरूमा भने खासै समस्या देखिएन ।

यस्तो छ व्यवस्था

महासंघको बिधानअनुसार सबैभन्दा धेरै गाउँपालिका जित्ने दलले अध्यक्ष र उपाध्यक्ष, दोस्रो हुनेले महासचिव र सचिव, तेस्रो हुनेले कोषाध्यक्ष पाउने व्यवस्था छ । त्यही व्यवस्था अनुसार एमालले अध्यक्ष र उपाध्यक्ष, कांग्रेसले महासचिव र सचिव पाएका छन् । यसैगरि माओवादी केन्द्रले कोषाध्यक्ष पाएको छ ।

विधानअनुसार एमालेबाट अध्यक्षसहित १५ जना, कांग्रेसबाट महासचिवसहित १२ जना, माओवादी केन्द्रबाट कोषध्यक्षसहित ६ जना, संघीय फोरमबाट २ जना, राजपाबाट १ जना र अन्य साना दलहरूबाट २ जना पदाधिका निर्वाचित भएका छन् ।

निर्वाचित पदाधिकारीहरूको बिबरण