१८ मंसिर, फलेवास पर्वत ।उत्तरी पर्वतको जलजला गाउँपालिका–३ पर्वत बेनीमा ‘लिफ्ट’ प्रविधिको खानेपानी आयोजना निर्माण कार्य शुरु भएको छ ।
खानेपानी तथा ढल निकास विभागको शहरीकरण उन्मुख बस्तीका लागि सञ्चालित सहलगानी कार्यक्रमअन्तर्गत अयोजना निर्माण हुन लागेको हो । बढ्दो बस्ती विकाससँगै माथिल्लो क्षेत्रका पानीका मुहान सुक्ने र खानेपानी आपूर्तिको समस्या बढिरहेको छ । पर्वत बेनीमा सञ्चालित उक्त आयोजनामार्फत नदी किनारको पानी तानेर वितरण गर्ने लक्ष्य राखिएको छ ।
खानेपानी तथा सरसफाइ सबडिभिजन कार्यालय पर्वतका इन्जिनियर विधान अर्यालले विद्युत्को सहायताले चल्ने सम्पवयल प्रविधिको पम्पबाट कालीगण्डकीको पानी तानेर बस्ती माथि पुर्याइने छ ।
ट्यांकीमा जम्मा भएको पानीलाई प्रशोधन गरी वितरण गरिने अर्यालले बताए । कालीगण्डकी नदीको दायाँ किनारमा रहेको जुगेपानीको मुहानबाट तानेर १ सय ५० मिटर माथि रहने ट्याङ्कीमा पु¥याइने पानीलाई चार चरणमा प्रशोधन गरी वितरण गरिने अर्यालले बताए ।
सरकारको ७० प्रतिशत अनुदान र उपभोक्ताको ३० प्रतिशत श्रम तथा नगद लगानीमा निर्माण गर्न लागिएको हो । आयोजनाबाट जलजला गाउँपालिकाका २, ३ र ४ नं वडामा पर्ने बगरफाँट, पर्वत बेनी र लामाखेतका करिब १ हजार घरधुरी लाभान्वित हुने पर्वत बेनी खानेपानी तथा सरसफाइ उपभोक्ता संस्थाका अध्यक्ष लोकनाथ रेग्मीले बताए ।
आगामी पुसपछि आबद्ध हुने सदस्यलाई रु २० हजारका दरले शुल्क लिने संस्थाले निर्णय गरेको छ । प्रत्येक घरमा मिटर जडित निजी धारामार्फत खानेपानी वितरण गर्ने लक्ष्य राखिएको आयोजना विसं २०७६ असार सम्ममा सम्पन्न गर्ने लक्ष्य राखिएको छ ।
प्रतिसेकेण्ड १२ लिटर पानी तान्ने क्षमताको पम्प जडान गरिने जनाइएको छ । मुहानमा इनार, पम्पिङ हाउस लगायतका पूर्वाधारसमेत निर्माण गर्ने तयारी भएको उपभोक्ता संस्थाका सचिव ठाकुर रेग्मीले बताए । रासस
प्रतिक्रिया