Logo

उम्मेदवारको मनोनयन दर्ता शान्तिपूर्ण



५ कात्तिक, काठमाडौं । मंसिर १० गते हुने पहिलो चरणको प्रतिनिधिसभा तथा प्रदेशसभा सदस्य निर्वाचनका लागि आज ३२ जिल्लामा शान्तिपूर्ण रुपमा उम्मेदवारी मनोनयन दर्ता भइरहेको छ । निर्वाचन आयोगका अनसार मुख्य निर्वाचन अधिकृत र निर्वाचन अधिकृतको कार्यालयमा उम्मेदवारी मनोनयनको दर्ता भइरहेको छ ।

दर्ता गर्न मुख्य निर्वाचन अधिकृत र निर्वाचन अधिकृतको कार्यालयबाट विभिन्न राजनीतिक दलका उम्मेदवार तथा स्वतन्त्र उम्मेदवारहरूले मनोनयनको फाराम लगिरहेका छन् । साथै उम्मेदवारी दर्ता पनि भइरहेको आयोगका प्रवक्ता नवराज ढकालले बताए । आज प्रतिनिधिसभा सदस्यतर्फ ३७ र प्रदेशसभातर्फ ७४ निर्वाचन क्षेत्रका लागी उम्मेदवारी दिँदैछ । विहान १० बजेदेखि चलेको मनोनयन दर्ता ५ बजेसम्म चल्ने छ ।

पहिलो चरणमा सोलुखुम्बु, संखुवासभा, भोजपुर, ओखलढुङ्गा, ताप्लेजुङ, पाँचथर, खोटाङ, नुवाकोट, रसुवा, धादिङ, सिन्धुपाल्चोक, दोलखा, रामेछाप, मुस्ताङ, म्याग्दी, बागलुङ, मनाङ, लमजुङ, गोरखा, रुकुम (पूर्वी भाग), रोल्पा, रुकुम (पश्चिम भाग), जाजरकोट, हुम्ला, मुगु, जुम्ला, कालीकोट, डोल्पा, दार्चुला, बझाङ, बाजुरा र बैतडीमा निर्वाचन हुनेछ ।

प्रतिनिधिसभा सदस्य निर्वाचनका लागि उम्मेदवारले मनोनयनपत्रका साथ नेपाली नागरिकता वा मतदाता परिचयपत्रको प्रतिलिपि, मतदाता नामावलीमा नाम समावेश भएको निस्सा, धरौटी जम्मा गरेको रसिद वा भौचर र दलको उम्मेदवारका हकमा आधिकारिक हस्ताक्षरसहितको औपचारिकपत्र बुझाउनुपर्ने छ । मनोनयनपत्रमा प्रस्तावक, समर्थक तथा उम्मेदवारको सहीछाप गरी पेश गर्नुपर्छ ।

धरौटी रकमका हकमा प्रतिनिधिसभा सदस्यका लागि रू १० हजार र प्रदेशसभा सदस्यका लागि रू पाँच हजार तोकिएको छ । महिला, दलित वा अल्पसंख्यक समुदाय वा आर्थिक रूपले विपन्न उम्मेदवारका हकका धरौटी रकममा ५० प्रतिशत छूट हुने व्यवस्था छ । प्रदेशसभा सदस्य निर्वाचनका लागि उम्मेदवार हुन सोही प्रदेशभित्रको गाउँपालिका वा नगरपालिकाको मतदाता नामावलीमा नाम समावेश भएको निस्सा पेश गर्नुपर्ने छ ।

समानुपातिक निर्वाचन प्रणालीको बन्दसूचीमा नाम समावेश भएको व्यक्ति पहिलो हुने निर्वाचित हुने निर्वाचन प्रणालीमा उम्मेदवार हुन र त्यस्तो व्यक्तिले मनोनयन गर्न नपाइने कानूनी व्यवस्था छ । एक व्यक्तिले एक पटकमा कुनै एक निर्वाचन क्षेत्रका लागि मात्र उम्मेदवारी दिन सक्ने छ । एकभन्दा बढी निर्वाचन क्षेत्रमा उम्मेदवारी दिएमा त्यस्ता उम्मेदवारको सबै क्षेत्रको उम्मेदवारी बदर हुने व्यवस्था छ । आगामी मंसिर २१ गते निर्वाचन हुने बाँकी ४५ जिल्लामा यही कात्तिक १६ गते मनोनयन दर्ताको कार्यक्रम छ । रासस

प्रतिक्रिया दिनुहोस्