१२ आश्विन २०७९, बुधबार | Thu Sep 29 2022

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

गाउँपालिकाकाे अध्यक्षहरू भन्छन्ः सरकारले नसके हामी आफैं कमचारी नियुक्त गर्छौं



स्थानीय खबर संवाददाता । सरकारले कर्मचारी खटाउन नसके आफैंले कर्मचारी नियुक्त गर्ने गाउँपालिकाका अध्यक्षहरूले चेतावनी दिएका छन् । गाविस महासंघले आयोजना गरेको कार्यक्रममा अध्यक्षहरूले अहिलेसम्म सरकारले कर्मचारी खटाउन नसकेका कारण काम गर्न गाह्रो भईरहेको बताएका छन् ।

प्रस्तावित गाउँपालिका महासंघको ४ नं. प्रदेशका संयोजक तथा दोलखा तामाकोशी गाउँपालिकाका अध्यक्ष इश्वरचन्द्र पोखरेलले सरकारले कतै पनि कर्मचारी खटाउन नसकेको बताए ।

 

“बजेट निकासा भयो, साउनको पहिलो हप्ताबाटै काम थाल्ने योजना थियो । कतै कार्यकारी अधिकृत नै छैनन् । कतै लेखाका कर्मचारी खटिएका छैनन्,” पोखरेलले भने, “सरकार लाचार भएर बस्ने हो भने स्थानीय सेवा ऐन जारी गरेर हामी आफैंले कर्मचारी नियुक्त गर्छौं । काम गर्न ढिला भईसक्यो ।”

महासंघको ४ नं. प्रदेश संयोजक तथा भिमसेन गाउँपालिका गोरखाका अध्यक्ष इश्वर पाण्डेले जिल्ल प्रशासन प्रमुख (सीडीओ)को संयोजकत्वमा रहेको कर्मचारी समायोजन समितिले केही काम गर्न नसकेको बताए । “सरकारले कर्मचारी खटाएँ भन्छ, यो झूठ हो । कोही गएकै छैन,” पाण्डेले भने, “सरकारले खटाएर पनि नआएको भए कर्मचारी पठाएको बोर्धाथ त पाउनु पर्ने नि ! बोर्धाथ नै पाएका छैनौं ।”

आईतबार बसेको ३ र ४ नं. प्रदेशका गाउँपालिका अध्यक्षहरूको बैठकले सरकारले कर्मचारी खटाउन नसके आफैंले नियुक्त गरेर काम थाल्ने निर्णय गरेका छन् । जनप्रतिनिधी आईसके पछि पनि विगतको जस्तै भद्रगोल अवस्थामा स्थानीय तहलाई राख्न खोजेको भन्दै उनीहरूले आक्रोस पोखेका छन् ।

“जनप्रतिनिधी आएर राम्रो काम गर्यो भने कर्मचारीलाई लज्जाबोध हुनु स्वभाविक हो । किनकी हिजो १५ बर्ष कर्मचारीले चलाएका थिए,” पाण्डेले भने, “विगतमा जस्तो भद्रगोल हुन नदिन पनि आफैंले कर्मचारी नियुक्त गरेर काम थाल्छौं । कसले रोक्दो रहेछ हेरौंला !”

पहिरो पिडितलाई सहायता दिन खोज्दा लेखापाल बेपत्ता !

रामेछाप गोकुलगंगा गाउँपालिकाका अध्यक्ष खड्गबहादुर सुनुवारले खिम्तिको पहिरोपिडितलाई साहयता दिन खोज्दा लेखापाल नै नभएका कारण चेक काट्न नसकिएको बताए । गाउँपालिकाको केन्द्रमा ९ र वडामा ३ जना कर्मचारी खटाउने भनिए पनि कार्यकारी अधिकृतबाहेक कोही नआएको बताए ।

“जति भन्दा पनि लेखापाल बस्न मान्दैन । पहिरोले घर पुरेर बिजोग भएको यत्रो दिन भइसक्यो, रहात दिन खोज्दा चेक काट्ने मान्छेसम्म भएन,” सुनुवारले भने । गएको असार ३१ गते गोकुलगंगा र लिखु गाउँपालिकाको सिमाना भएर बग्ने छतवनी खोलामा आएको बाढीले तीन घर पुरेको थियो । त्यसबेला दुई जनाको मृत्यु र ३ जना वेपत्ता भएका थिए ।

प्रकाशित मिति : ३० श्रावण २०७४, सोमबार ००:००