३ असार २०८१, आइतबार | Sun Jun 16 2024

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

स्थानीय तहमा शिक्षाका कर्मचारी खटाउन सुरु, कार्यक्षेत्रबारे अझै अन्योल



प्रकाश सिलवाल

काठमाडौँ, ३१ असार ।

शिक्षा मन्त्रालयले काठमाडौँ महानगरपालिकासहित विभिन्न स्थानीय तहमा आफ्ना कर्मचारी पठाउन सुरु गरेको छ । कर्मचारीले सरुवा पूर्व कार्यक्षेत्र र अधिकार स्पष्ट पार्न माग गरेपनि त्यसबारे निर्णय नहुँदै कर्मचारी स्थानान्तारण सुरु भएको छ । मन्त्रालयले बिहीबार र शुक्रबारको निर्णयबाट निर्वाचन सम्पन्न भएका पाँच महानगरपालिकासहित अन्य उपमहानर, नगरपालिका र गाउँपालिकामा क्रमशः कर्मचारी पठाउन थालेको प्रवक्ता डा हरि लम्सालले जानकारी दिए ।

साविकका जिल्ला शिक्षा कार्यालय हालसम्म यथावत् रहेको अवस्थामा स्थानीय तहमा जाने शिक्षाका कर्मचारीको कार्यक्षेत्र अन्योल देखिएको छ । संविधानतः माध्यमिक तहसम्मको शिक्षा सञ्चालनको जिम्मेवारी स्थानीय तहलाई दिइएकाले शिक्षाका निकायको काम स्थानान्तरण हुनलागेको हो ।

हाल राजपत्राङ्कित प्रथम श्रेणीका २३ सहित शिक्षा मन्त्रालय मातहतमा दुई हजार ७०१ कर्मचारी छन् भने त्यसमध्ये एक हजार ४७० शिक्षा प्रशासन सेवा समूहका छन् । शिक्षाबाट खटिएर जाने कर्मचारी स्थानीय तहमा हाल कार्यरत कार्यकारी अधिकृत भन्दा वरिष्ठ भएमा कसरी काम गर्ने वा लगाउने भन्ने अन्योल चिर्न शिक्षा मन्त्रालय, सङ्घ्ीय मामिला तथा स्थानीय विकास र सामान्य प्रशासन मन्त्रालयका सचिव रहेको कार्यदलले निकास खोज्ने प्रयास जारी राखेको छ ।

शिक्षा पनि प्रशासन समूहभित्रपर्ने भएकाले यसबाट खटिने कर्मचारीलाई पनि वरिष्ठताका आधारमा कार्यकारी अधिकृत पनि हुन पाउने गरी मन्त्रिपरिषद्बाट निर्णय गराउने तयारी भएको सो सङ्घका सचिव गेहनाथ गौतमले जानकारी दिए ।

काठमाडौँ महानगरपालिकामा खटाइएका उपसचिव प्रल्हाल अर्यालले आफ्नो रोजाई शैक्षिक गुणस्तर मापन केन्द्र हो । तर उनको कार्यक्षेत्र पनि स्पष्ट छैन । “मभन्दा कनिष्ठलाई काठमाडौंको जिल्ला शिक्षा अधिकारी बनाइएको छ,” अर्यालले भने, “कसरी समन्वय गर्ने हो स्पष्ट भइसकेको छैन ।”

शिक्षाका निकायमा कार्यरत कर्मचारीहरुले नेपाल शिक्षा प्राविधिक सङ्घ गठन गरी ज्येष्ठता र अनुभवको सम्मान तथा सेवा सुविधाबारे पहिला स्पष्ट पार्नुपर्ने माग गरेका थिए । खटाइएका कर्मचारीहरुले कार्यक्षेत्र स्पष्ट नभई सम्बन्धित स्थानीय तहमा जान आनाकानी गरेका छन् भने कतिपयले आफूले रोजेको स्थानीय तहमा जाने रहर देखाएका छन् ।

तीन महिनाअघि शिक्षा मन्त्रालयले सहसचिव सूर्यप्रसाद गौतमको संयोजकत्वमा गठन गरेको कार्यदलले स्थानीय तहमा आफ्ना कर्मचारी समायोजन र कामको हस्तान्तरणबारे सुझाव दिएको थियो ।

प्रतिवेदनले महानगरपालिकामा शिक्षा सेवाका सहसचिवको नेतृत्वमा एक शैक्षिक व्यवस्थापन महाशाखा र त्यसको मातहतमा आधारभूत र मावि शिक्षा शाखा, उपसचिवको नेतृत्वमा उपमहानगरपालिका र नगरपालिकामा शैक्षिक व्यवस्थापन शाखा र गाउँपालिकामा शाखा अधिकृतको नेतृत्वमा शैक्षिक व्यवस्थापन शाखा राख्न सुझाव दिएको थियो । रासस

प्रकाशित मिति : ३१ असार २०७४, शनिबार ००:००