धनकुटा । स्थानीय तहको चुनावमा अपाङ्गता भएकाहरुका लागि सहज मतदान गर्न जिल्लाका ६७ अपाङ्गमैत्री मतदान केन्द्र स्थापना गरिएको जिल्ला निर्वाचन कार्यालयले जनाएको छ ।
धनकुटा जिल्लाका कुल १४३ वटा मतदान केन्द्रमा ६७ केन्द्र अपाङ्गमैत्री बनाइएको छ । जिल्लामा तोकिएका अधिकांश मतदानकेन्द्र विद्यालय र पुराना गाविसका भवनमा रहेका कारण कठिनाइ भएको जनाइएको छ ।
स्थानीय तहको निर्वाचनमा धनकुटा नगरपालिकामा थप दुई अपाङ्गमैत्री मतदान केन्द्र निर्माण गरिएको जिल्ला निर्वाचन कार्यालय, धनकुटाले जनाएको छ । तीन नगरपालिकासहित सात स्थानीय तह रहेको जिल्लामा ११७ मतदानस्थलमा १४३ मतदान केन्द्र रहेका जिल्ला निर्वाचन कार्यालय, धनकुटाले जानकारी दिएको छ ।
जिल्ला निर्वाचन कार्यालयको तथ्याङ्क अनुसार जिल्लाको कुल ९५ हजार ३६७ जना मतदातामध्ये १७३ जना अपाङ्गता भएका मतदाता रहेको उल्लेख छ । अपाङ्गता भएकै कारण धेरै मतदाताले वञ्चित हुनुपरेको गुनासो आएपछि अपाङ्गमैत्री केन्द्र बढाउने क्रममा रहेको जिल्ला निर्वाचन कार्यालय, धनकुटाका प्रमुख प्रदीप साहले बताए । रासस
प्रतिक्रिया