Logo

चुनाव तयारीका लागि दलहरु गाउँ गाउँ पुग्न थाले



लहान, दोस्रो चरणको स्थानीय तहको चुनाव नजिकिँदै जाँदा सिरहामा दलका नेता तथा कार्यकर्ता गाउँ गाउँमा पुग्न थालेका छन् । जेठ ३१ गते हुने स्थानीय तहको चुनावका लागि उनीहरु गाउँ गाउँ पुग्न थालेपछि चुनावी गतिविधिले तीव्रता पाउन थालेको हो ।

नेपाली कांग्रेस, नेकपा एमाले र माओवादी केन्द्र सहितका दलले जिल्लामा चुनावी प्रचार प्रसार अभियानलाई तीव्र पारेका छन् । चुनाव प्रचार प्रसारकै क्रममा नेपाली कांग्रेस सिरहाले बुधबार लहान नगरपालिका क्षेत्रमा मोटरसाइकल र्यालीसमेत निकालेका छन् । मोटरसाइकल र्यालीले लहान नगरपालिकाको २४ वटै वडामा परिक्रमा गरिने कांग्रेस सिरहाले जनाएको छ ।

जिल्लाका गाउँपालिका र नगरपालिकाका लागि सम्भावित उम्मेदवारको छनौट, अगुवा कार्यकर्ताको प्रशिक्षक तथा नियमित बैठक, छलफललगायत गतिविधि गरिरहेको नेपाली कांग्रेस सिरहाका सभापति तथा सांसद रामचन्द्र यादवले जानकारी दिए ।

त्यस्तै, नेकपा एमाले सिरहाले लहान नगरपालिका– १९ सोनामती मझौरामा चुनावी कार्यक्रम सम्पन्न गरेको छ । आन्तरिक प्रशिक्षण, पार्टी प्रवेशलगायत चुनावी गतिविधि सञ्चालन गरेको एमालेका नेता तथा कार्यकर्तापनि गाउँ गाउँमा पुग्न थालेका छन् ।

यस्तै, माओवादी केन्द्रले पनि सिरहाको गोलबजार नगरपालिका– ८ लबटोली जगतपुरमा गाउँस्तरीय भेला सम्पन्न गरेको छ । निर्वाचनलाई लक्षित गरी पार्टी प्रशिक्षण, स्थानीय तहको निर्वाचनमा उम्मेदवारी दिने आकाङ्क्षीको सूची तयारी तथा बैठक र छलफल नियमितरुपमा भइरहेको पार्टीका केन्द्रीय सदस्य हरिनारायण चौधरी बताछन् । उनी भन्छन्, “निर्वाचन र साङ्गठनिक अभियान लिएर गाउँ गाउँका पार्टीका अगुवा नेता तथा कार्यकर्तासँग नियमित छलफल अन्तरक्रिया तथा जिल्लाका स्थानीय तहमा उम्मेदवार हुने आकाङ्क्षीको समेत सूची तयार गरिरहेका छौं ।”

संविधान संशोधन नभएसम्म निर्वाचनमा भाग नलिने बताउँदै आएका मेधसवादी दलले पनि आन्तरिकरुपमा चुनाव लक्षित गतिविधि गर्दै आएका छन् । निर्वाचनको आन्तरिक तयारीमा जुटेको सङ्घीय समाजवादी फोरम नेपाल धमाधम अरू पार्टीबाट नेता तथा कार्यकर्तालाई पार्टीमा भित्र्याउन थालेका छन् ।

त्यस्तै, राष्ट्रिय जनता पार्टीले पनि आन्तरिकरुपमा नगरपालिका र गाउँपालिकाका लागि सम्भावित उम्मेदवारको सूची बनाइरहेको ती पार्टीका नेताले बताएका छन् । करिब २० वर्षपछि हुन लागेको स्थानीय तहको निर्वाचनलाई लक्षित गरी दलहरु गाउँ गाउँ पुग्न थालेपछि ग्रामीण क्षेत्रमा चुनावी चर्चा–परिचर्चाले समेत व्यापकता पाएको छ ।

सिरहामा सात नगरपालिका र १० गाउँपालिकाका १५८ वडाबाट कम्तीमा ३१६ महिलासहित ८२४ जनप्रतिनिधि चुनिनेछन् । त्यसमा दलित महिला १५८ जना पर्नेछन् । एक लाख ७५ हजार १८४ पुरुष, एक लाख ५६ हजार ४११ महिला र एकजना तेस्रोलिङ्गी गरी कुल तीन लाख ३१ हजार ५९६ मतदाता रहेको सिरहामा ४२६ वटा मतदान केन्द्र र २१९ मतदानस्थल तोकिएको जिल्ला निर्वाचन कार्यालय सिरहाले जनाएको छ । सिरहामा ३२ वटा राजनीतिक दल निर्वाचन कार्यालयमा दर्ता भएका छन् । रासस

प्रतिक्रिया दिनुहोस्