Logo

धार्चे गापामा कांग्रेस, सहिद लखनमा माओवादी



गोरखा, गोरखाको धार्चे गाउँपालिकामा नेपाली कांग्रेसका उम्मेदवार सन्तबहादुर गुरुङ (सन्तोष) र फूलमाया गुरुङ क्रमशः प्रमुख र उपप्रमुख पदमा विजयी भएका छन् । नेकपा एमाले र नयाँ शक्ति नेपाल पार्टीबीच तालमेल भई प्रमुख पदमा लडेका नयाँ शक्तिका लक्ष्मण गुरुङ पराजित भएका छन् ।

प्रमुख पदमा विजयी सन्तबहादुरले एक हजार ७०९ मत ल्याएका छन् भने निकटतम प्रतिद्वन्द्वी नयाँ शक्तिका लक्ष्मणले एक हजार ६५६ मत प्राप्त गरेका छन् । उपप्रमुखका कांग्रेसकी फूलमायाले एक हजार ५९५ मत ल्याएकी छन् भने नेकपा माओवादी केन्द्रकी आशा गुरुङले एक हजार १२८ मत प्राप्त गरी पराजित भएकी छन् ।

माओबादीले खाता खोल्यो

माओवादी केन्द्रले सहिद लखन गाउँपालिकाको प्रमुख र उपप्रमुखमा जितेर गोरखामा विजयको खाता खोलेको छ । प्रमुखमा रमेश थापाले तीन हजार ८०८ मत ल्याएका छन् भने निकटतम प्रतिद्वन्द्वी कांग्रेसका कृष्णबहादुर आलेले तीन हजार ४०४ मत प्राप्त गरेका छन् ।

यस्तै, उपप्रमुखमा माओवादी केन्द्रकी इन्दिरा तिवारीले तीन हजार ७९८ मत प्राप्त गरेकी छन् भने निकतटम प्रतिद्वन्द्वी कांग्रेसकी शर्मिला श्रेष्ठले तीनहजार ५७५ मत प्राप्त गरेको निर्वाचन अधिकृतको कार्यालयले जनाएको छ ।

यसअघि चुमनुब्री, सिरानचोक, अजिरकोट र गण्डकी गाउँपालिकामा कांग्रेसले विजय हासिल गरिसकेको छ । भीमसेन, आरुघाट, सुलिकोट गाउँपालिकामा मत गणना भइरहेको छ । यस्तै, गोरखा नगरपालिका र पालुङटार नगरपालिकामा पनि मतगणना भइरहेको छ । रासस

प्रतिक्रिया दिनुहोस्