१५ चैत्र २०८०, बिहिबार | Thu Mar 28 2024

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

बाबुको प्रतिद्वन्द्वीलाई चुनौती दिँदै छोरा



गोकर्णप्रसाद भण्डारी । दोलखा, दोलखाको तामाकोसी गाउँपालिका वडा नम्बर १ मा चुनावको रोचक पक्ष देख्न सकिन्छ ।

युवा जोस जाँगरका साथ समाजको विकासका लागि आमूल परिवर्तनको पक्षमा टेकेर यतिबेला महेश्वर काफ्ले वडा अध्यक्षको पदमा चुनावी मैदानमा छन् । तिनै काफ्लेको प्रतिद्वन्द्वीका रुपमा छन् पुराना बुबा पुस्ताका नेता ज्ञानेन्द्र केसी ।

ज्ञानेन्द्र केसी भिरकोटका पूर्व गाविस अध्यक्ष हुन् अहिले भिरकोट गाविस तामाकोसी गाउँपालिका–१ मा परिवर्तन भएको छ । काफ्ले र केसीको राजनीतिक लडाइँ बाजे पुस्ता– जहाँकी महेश्वरका बुबा पृथ्वीबहादुर काफ्लेसँग केसीका बुबा रणबहादुर केसी देखिकै हो ।

विसं २०४५ तिर पृथ्वीबहादुर काफ्लेले प्रधानपञ्चका रुपमा आफूलाई उभ्याउँदा, तिनै ज्ञानेन्द्रका बुबा रणबहादुरले हारेको र पृथ्वीले जितेका थिए । भिरकोटका स्थानीयवासी कुमार भुजेलका अनुसार २०४९ सालमा पुनः स्थानीय निकायको निर्वाचन भयो, जसमा फेरि पृथ्वीबहादुर काफ्लेले नै गाविस अध्यक्ष जिते ।

त्यतिबेला पनि ज्ञानेन्द्रको टिमले नै पराजय ब्यहोर्यो । फेरि अर्को कार्यकाल २०५४ सालमा स्थानीय निकायको निर्वाचन भयो तिनै दुई, पृथ्वी र ज्ञानेन्द्र गाविस अध्यक्षका उम्मेदवार भए । पृथ्वीले थोरै मतका बीच पराजय ब्यहोरे, ज्ञानेन्द्र अध्यक्ष पदमा विजयी भए ।

आगामी वैशाख ३१ गते हुन गइरहेको निर्वाचनमा पनि त्यही परिवारको लडाइँ चलिरहेको छ भिरकोटमा । पृथ्वीका माइला छोराका रुपमा जो २०४५ सालमा जन्मेका महेश्वर काफ्ले र बुबाको प्रतिस्पर्धीका रुपमा रहेका ज्ञानेन्द्र केसीबीच यो वडामा व्यापक मात्रामा चुनावी प्रतिस्पर्धा चलिरहेको छ ।

नेपाली कांग्रेसका काफ्लेलाई नेकपा माओवादी केन्द्रको समेत समर्थन रहेको छ भने केसी एमालेबाट उम्मेदवार छन् । उनीहरु भन्छन्, जित सुनिश्चित भइसक्यो । उनीहरु दुवै जित सुनिश्चित भएको दाबी गर्छन् । तर काफ्लेलाई सो वडाका युवा पुस्ताको व्यापक समर्थन रहेको देखिन्छ भने केसीलाई बुढ्यौली तहका पुस्ताले सहयोग गर्ने देखिन्छ । काफ्ले युवा पुस्ताका लोकप्रिय उम्मेदवार हुन् ।

काफ्लेका नाममा प्रचारका लागि दुईवटा गीतसमेत रेकर्ड भएको छ । गायिका मनु थामी र हिमाल केसीले काफ्लेको पक्षमा चुनावी गीत रेकर्ड गरेका छन् । यता केसी पनि आफ्नो पक्षमा मतदान गर्न घरदैला अभियान चलाइरहेका छन् ।

काफ्ले र केसीलाई अहिले माझीबस्ती, र केही दलित समुदायको भावना समेट्न निकै कठिनाइ भइरहेको छ । उनीहरुको पक्षको मत पार्न काफ्ले सहजैरुपमा गाउँ प्रवेश गरिरहेका छन् भने केसीलाई हम्मेहम्मे भएको माझी समुदाय बताउँछन् । करिब २० वर्षपछि हुन लागिरहेको यस स्थानीय तहको निर्वाचनमा पृथ्वीबहादुर काफ्ले भने छैनन्, उनको २०५८ सालमा नै मृत्यु भइसकेको छ ।

दुबैले चुनावमा नारा भने विकास कै लगाइरहेका छन् । काफ्ले भन्छन्, आफूले चुनाव जिते भूकम्पपीडित र गरिब विपन्न समुदायले सुख पाउनेछन् । उनी भन्छन्, यो राजनीतिक लडाइँ मात्रै होइन, समाजमा युवापुस्ता कसरी स्थापित गर्ने भन्ने पनि चिन्ता हो मलाई ।

युवा र बृद्घ पुस्ताको यस चुनावी लडाँईमा काफ्ले पढाइका हिसाबले केसीभन्दा माथि छन् भने केसी पुराना र अनुभवी मानिन्छन् । रासस

प्रकाशित मिति : २६ बैशाख २०७४, मंगलबार ००:००