नारायण अधिकारी
पुस १०, चितवन । जिल्लाको प्रमुख शहर नारायणगढ बजार नजिकै रहेको बिपी शान्तिनगर वनलाई भरतपुर महानगरपालिकाले आकर्षक पार्कका रुपमा विकास गर्ने भएको छ ।
नारायणी नदीको बीचमा टापुका रुपमा रहेको नगरवन ११२ बिघा क्षेत्रफलमा फैलिएको छ । सिसौ, टिक, खयर, बाँस, बेद, सिमल, इपिलइपिलको रुख र झाडीले ढाकेको टापुको बीचमा बिपीको शालिक छ भने सँगै तीन टहरा रहेका छन् । शालिक जीर्ण बनेको छ । टहरा प्रयोगविहीन छन् । जताततै झाडीले ढाकिएको छ ।
भरतपुर महानगरपालिकाका प्रमुख रेनु दाहाल सो ठाउँलाई आकर्षक पार्कका रुपमा विकास गर्न लागिएको बताइन् । हाल अत्यावश्यक कामका लागि ४० लाख विनियोजन गरेर काम थालेको र राष्ट्रिय गौरवको आयोजनाका रुपमा नगरवनलाई राखेर काम गर्ने सोच बनाएको उनी बताउछिन् । “गुरुयोजना तयार गरी सङ्घीय सरकारसँग बजेट माग गरेर देशकै महत्वपूर्ण पार्कका रुपमा विकास गर्ने योजना छ,” दाहालले भनिन् ।
विश्वका ठूला शहरमा पर्यटकलाई घुमाउनका लागि बनाइने पार्क जस्तै विभिन्न गतिविधि गर्न मिल्ने गरी उद्यान निर्माण गर्ने महानगरको लक्ष्य छ । सो ठाउँ जिल्ला वन अन्तर्गत पर्दछ । पहिलो चरणमा सो क्षेत्रको स्वामित्व ग्रहण गरी गुरुयोजना निर्माण गरेर काम अगाडि बढाउन लागिएको हो ।
भरतपुर महानगरपालिका ३ का वडाध्यक्ष चन्द्रमित्र पण्डित हाल विनियोजित बजेटबाट चार वनभोज स्थल, फुटपाथ निर्माण, वृक्षरोपण, बिपीको शालिकको मर्मत र रङरोगन, शालिक आसपास बगैँचा निर्माण, विद्युत्को व्यवस्था, शौचालय तथा पानीको व्यवस्था गरिँदैछ ।
सोही ठाउँमा बालबालिकाका लागि पार्क तथा सुरक्षाको व्यवस्थासमेत मिलाइँदै छ । सो क्षेत्रमा वन्यजन्तुबाट जोगिनका लागि विद्युतीय तारबारसमेत गर्ने योजना छ । सीमित ठाउँमा तारबार गरिन्छ भने अन्यत्र क्षेत्रमा जनावरका लागि उपयुक्त हुने गरी छाडिनेछ ।
नारायणीको भङ्गालोमाथि बनाइएको झोलुङ्गे पुल तरेर नगरवन जानुपर्ने हुन्छ । भङ्गालोको पानीमा जल क्रिडा गर्न मिल्ने गरी व्यवस्थापन गर्ने योजना बनाइएको पण्डितले बताए । झोलुङ्गे पुलको छेउमा आकर्षक रेष्टुरेण्ट सञ्चालन गर्ने योजना छ ।
यहाँ हाल एकसिङ्गे गैँडा, बाघ, मृग, चित्तल लगायतका जनावर र चराचुरुङ्गी देख्न पाइन्छ । नारायणी नदीको मूल प्रवाह र भङ्गालाको बीचमा नगरवन छ । नगरवन संरक्षण समितिका पूर्वअध्यक्ष वामदेव खनाल सो क्षेत्रमा २०१८ देखि जङ्गल बन्दै गएको बताउछन् । विसं २०३९ मा भरतपुर नगरका तत्कालीन प्रधानपञ्च मुक्तिलाल चुकेले बोटे हटाएर वृक्षरोपणको थालनी गरी पार्कका रुपमा विकास गरेका हुन् ।
यहाँ हरेक वर्ष बिपीको स्मृतिमा वृक्षरोपण गरिँदै आएको छ । वनको व्यवस्थापन भने खासै हुन सकेको थिएन । सो ठाउँमा चुकेकै पहलमा बिपीको शालिक निर्माण गरिएको हो । शालिकको तत्कालीन प्रधानमन्त्री गिरिजाप्रसाद कोइरालाले अनावरण गरेका थिए । रासस
प्रतिक्रिया