Logo

चुनाव सरेपछि निर्वाचन गतिविधि सुस्त



बैतडी, सरकारले दुई चरणमा स्थानीय निर्वाचन गर्ने निर्णय गरेसंगै बैतडी लगायत प्रदेश नं ७ मा निर्वाचन गतिविधिमा सुस्तता आएको छ ।

प्रदेश नं। १, २, ५ र ७ मा जेठ ३१ गते तथा ३, ४ र ६ नं। प्रदेशमा वैशाख ३१ गते स्थानीय तहको निर्वाचन गर्ने निर्णय गरे संगै वैशाख ३१ को प्रदेश नं ७ को निर्वाचन जेठ ३१ मा सारेपछि निर्वाचन गतिविधिमा सुस्तता आएको दोगडाकेदार–३ श्रीकोटका हेमराज गिरीले बताए । “गाउँ सहर निर्वाचनमय भइसकेको थियो”, उनले भने, “जेठ ३१ मा चुनाव सारेपछि निराशा छाएको छ ।”

जेठ ३१ मा निर्वाचन हुने भएपछि निर्वाचन अधिकृतको कार्यालय स्थापना गर्ने कार्य पनि आयोगले अर्को निर्णय नगर्दासम्मका लागि रोकिएको जिल्ला निर्वाचन अधिकारी माधव फुयाँलले बताए । “वैशाख १ गतेदेखि सुरु भएको मतदाता शिक्षा कार्यक्रम पनि स्थगित भएको छ”, उनले भने, “दुई चरणमा निर्वाचन हुने भएपछि चुनावी गतिविधिमा सुस्तता आएको छ ।”

पहिलो चरणको निर्वाचनका लागि तयारीमा रहेका दल दोस्रो चरणमा चुनाव हुने भएपछि चुनावी अभियानलाई विश्राम दिन थालेका छन् । बैतडीमा दोस्रो चरणमा निर्वाचन हुने भएपछि उम्मेदवार छनौटको कसरतमा लागिरहेका दल अब बिस्तारै उम्मेद्वार छान्ने मनस्थितिमा पुगेका छन् । जेठ ३१ मा चुनाव हुने भएपछि उम्मेद्वार छनौट प्रक्रिया बिस्तारै थाल्ने नेपाली कांग्रेस बैतडीका कोषाध्यक्ष रमेश पाण्डेयले बताए ।

राप्रपाले पनि उम्मेदार छनौट कार्यलाई बिस्तारै गर्ने जनाएको छ । पहिलो चरणमा बैतडीमा चुनाव नहुने भएकाले दोस्रो चरणका लागि बिस्तारै उम्मेदवारको टुंगो लगाउने राप्रपाका जिल्ला सचिव प्रजापति जोशीले बताए ।

माओवादी केन्द्रका जिल्ला संयोजक प्रेमप्रकाश भट्ट (आदित्य)ले सरकारले चुनावको मिति सार्नुभन्दा पहिले नै बैतडीका दश स्थानीय तहमा उम्मेदवार घोषणा गरिसकेकाले अहिले प्रचारप्रसारमा जुटेको बताए ।

जिल्लाका १० ओटै स्थानीय तहमा प्रमुख, उपप्रमुख, अध्यक्ष र उपाध्यक्षका उम्मेद्वारको टुंगो लगाएको नेकपा एमाले र माओवादी केन्द्रले पनि चुनावी गतिविधिमा सुस्तता आएको बताए । आफ्नो पार्टीले चुनावी गतिविधिलाई कम नगरे पनि सरकारले चुनाव नै नगर्ने हो कि भन्ने आशंका जन्माएको एमाले बैतडीका सचिव लीलाधर भट्टले बताए ।

सरकारले दोस्रो चरणमा निर्वाचन गर्ने भएपछि गाउँघरमा बढेको चुनावी सरगर्मी एक्कासि घटेको दोगडाकेदार–३ श्रीकोटका वीर सिंह भाटको भनाइ छ । रासस

प्रतिक्रिया दिनुहोस्