काठमाण्डौं, राष्ट्रिय प्रजातन्त्र पार्टीले आगामी दश वर्षमा प्रत्येक नगरपालिकालाई आधुनिक र सबै सुविधा युक्त सहर ‘स्मार्ट सिटी’ का रुपमा विकास गर्ने लक्ष्य लिएको छ ।
स्थानीय तहको निर्वाचनका लागि बुधबार जारी गरिएको संकल्पपत्रमा प्रत्येक गाउँपालिकालाई स्थानीय जनताको आधारभूत आवश्यकता परिपूर्ति गरी आत्मनिर्भर र व्यवस्थित नगरोन्मुख गाउँका रुपमा विकास गराउने उल्लेख छ । उक्त कार्यक्रममा पार्टीका अध्यक्ष कमल थापा, वरिष्ठ नेता विश्वबन्धु थापा र पशुपति शम्शेर राणाले संयुक्त रुपमा सो संकल्पपत्रको सार्वजनिक गरेका हुन् ।
राष्ट्रियता, प्रजातन्त्र, हिन्दूत्व र आर्थिक उदारवादको धरातलमा समृद्ध नेपाल निर्माण गर्ने लक्ष्य लिई चुनाव जितेको गाउँ वा नगरपलिकालार्इ ‘नमुना स्थानीय तह’का रुपमा स्थापित र सञ्चालन गरिने उल्लेख छ ।
राष्ट्रनिर्माता पृथ्वीनारायण शाहको आदर्श, मान्यता र योगदानको सम्मान गरिने गरी संकल्पपत्र जारी गरिएको छ । पार्टीले जितेका गाउँ वा नगरपालिका अन्तर्गतका प्रत्येक कार्यालयमा राष्ट्रनिर्माताको तस्बिर अनिवार्य रुपमा राखिने छ ।
गाउँ वा नगरपालिका भित्रका विद्यालयको पाठ्यक्रममा राष्ट्रियताको भावना अभिवृद्धि हुने विषय समावेश गरिने, स्थानीय भाषा, संस्कृति र पहिचानको संरक्षण गर्दै विविधतामा एकताको मान्यतालाई सुदृढ गरिने ,स्थानीय तहमा गौहत्यालाई पूर्णतः निषेध गरी त्यस्तो अपराधमा संलग्नलाई कडा कारबाही गरिने र गौरक्षाको लागि प्रत्येक गाउँ वा नगरपालिकामा गौशाला निर्माण गरिने उल्लेख गरिएको छ ।
कुल बजेटको कम्तीमा २० प्रतिशत शिक्षा क्षेत्रमा विनियोजन गरिने संकल्पपत्रमा उल्लेख छ । गाउँपालिका र नगरपालिकाबाट अनुदान प्राप्त गर्ने विद्यालयमा माध्यामिक तहसम्मको पढाइ निःशुल्क गरिने, सार्वजानिक र निजी विद्यालयमा प्रयोग हुने पाठ्यसामग्रीमा देखिएका भिन्नतालाई सम्बोधन गर्न पाठ्यसामग्रीमा आवश्यक परिमार्जन गरी एकरूपता कायम गरिने छ ।
प्रत्येक गाउँ वा नगरपालिकामा कम्तीमा २५ शैयाको अस्पताल निर्माण गरिने छ । अनुदानप्राप्त अस्पतालमा प्राथमिक स्वास्थ निःशुल्क हुनेछ । प्रत्येक गाउँ वा नगरपालिकाहरुमा स्वास्थ्य उपचार कोष खडा गरिने छ ।
विपन्न परिवारमा प्रतिशिशु एकमुष्ठ रु पाँच हजार ‘सुपोषण अनुदान’ आमामार्फत प्रदान गरिनेछ । न्यून आय भएका लक्षित वर्गलाई आवास सुविधा उपलब्ध गराउन विशेष आवास परियोजना कार्यान्वयन गरिने राप्रपाको संकल्पपत्रमा उल्लेख छ ।
गरिबी निवारण र रोजगारी संवर्द्धन तथा कृषि, उद्योग तथा वाणिज्य क्षेत्रको विकास गरिने छ । गाउँ वा नगरपालिकाभित्र २५ भन्दा बढीलाई रोजगारी प्रदान गर्ने उद्योग तथा व्यवसायलाई १० वर्षसम्म सबै प्रकारका स्थानीय कर मिनाहा गरिने छ । कृषि क्षेत्रको व्यावसायिकीकरण, आधुनिकीकरण र यान्त्रिकीकरणका लागि प्रत्येक गाउँ नगरपालिकाको विशिष्ठताको आधारमा कृषि क्षेत्र विकास योजना कार्यान्वन गरिने छ ।
सुशासन र भ्रष्टाचारमुक्त प्रशासन
गाउँ नगरपालिकामा भ्रष्टाचार मुक्त प्रशासन कायम गरी नगरपालिका र गाउँपालिकालाई ‘विकास र प्रगतिको केन्द्र’ बनाइने छ । यस प्रयोजनका लागि आवश्यक संरचनागत व्यवस्था र कानुनी आधार तयार गरिने छ ।
महिला सशक्तीकरण, महिला साक्षरता अभियान सञ्चालन गरिने छ । वैदेशिक रोजगारीमा गएका महिलाको अभिलेख राखी उनीहरुको स्थितिका बारेमा जानकारी राखिने छ । समस्या परेको अवस्थामा आवश्यक सहयोग गरिने छ ।
आदिवासी, जनजाति, दलित, अपाङ्ग, मुस्लिम समुदाय तथा दुर्गम क्षेत्रको उत्थान कार्यक्रम अन्तर्गत आर्थिक, सामाजिक एवम् राजनीतिक दृष्टिकोणबाट पछाडि परेका आदिवासी, जनजाति, अल्पसंख्क तथा मुस्लिम समुदायको हित, उत्थान र अधिकारको संरक्षण र संवर्द्धनका निमित्त विशेष कार्ययोजना कार्यान्वयन गरिने छ ।
सो अवसरमा वरिष्ठ नेता राणाले पार्टीको सिद्धान्त प्रजातन्त्र, शान्ति र आर्थिक उदारवाद भएको बताउँदै त्यसको माध्यमबाट मुलुकमा सामाजिक परिवर्तन गर्न सकिने बताए । रासस
प्रतिक्रिया