Logo

उद्यमी तयार गर्दै ताराखोला गाउँपालिका



 

२० असार, बागलुङ । ताराखोला गाउँपालिकाले स्थानीय स्रोत साधनमा आधारित उद्यमशीलता प्रवद्र्धन कार्यक्रम शुरु गरेको छ । जनशक्तिलाई उत्पादनसँग जोडेर स्वाधीन गाउँपालिका बनाउने लक्ष्यका साथ उक्त कार्यक्रम अघि बढाएको हो ।

उद्यम विकास कार्यक्रमले रोजगार सिर्जना गर्नुका साथै आर्थिक गतिविधि बढ्ने गाउँपालिकाका अध्यक्ष प्रकाश घर्तीले बताए ।“यहीँको स्रोत साधनको उपयोगबाट उद्यम चलाउने योजना छ”, उनले भने, “यसबाट गाउँगाउँमा उद्यमी तयार हुन्छन् ।” स्थानीय आवश्यकता र सम्भावना पहिचान गरेर उद्यम विकासमा गाउँपालिकाले सघाउने उनको भनाइ छ । गाउँपालिकाले चालु आवमा उद्यममा लाग्न इच्छुक समूह र संस्थालाई ज्ञान, सीप, प्रविधि र उपकरण प्रदान गरेको छ ।

स्थानीय उद्यमीले पहिलोपटक अल्लो प्रशोधनका लागि आधुनिक उपकरण पाएका छन् । गाउँपालिकाले सात लाख ५० हजारको उक्त यन्त्र वडा नं ५ को सोनाम अल्लो कपडा समूहलाई प्रदान गरेको हो । प्रशोधनसहित धागो निकाल्न प्रयोग हुने पाँच प्रकारका उपकरण समूहले पाएको गाउँपालिकाका प्रमुख प्रशासकीय अधिकृत टोपलाल भुसालले बताए ।

अल्लोको व्यावसायिक प्रवर्द्धनका लागि गाउँपालिकाले उपकरण उपलब्ध गराएको हो । यसअघि आधुनिक प्रविधि नहुँदा हातैले अल्लो चुटेर धागो निकाल्नुपर्ने अवस्था थियो । घरेलु प्रविधिबाट उत्पादन न्यून हुने हुँदा सोचेजति व्यवसायीकरण हुन सकेको थिएन । नयाँ प्रविधिले गुणस्तरीय अल्लोको धागो उत्पादनमा सघाउ पु¥याउने ठानिएको छ ।

“उपकरणको अभावमा अल्लोको उत्पादन संकटमा परेको थियो” भुसालले भजे, “अब उत्पादन बढ्ने र बजारीकरण हुनेमा हामी विश्वस्त छौँ ।” गाउँपालिकाले वडा नं २ को लेकाली अल्लो समूहलाई अल्लोको कपडा बुन्ने तानसमेत उपलब्ध गराएको छ । ३५ हजार मूल्यको उक्त तानबाट कपडा, झोला, टोपीलगायत सामग्री बुन्न सकिनेछ ।

गाउँपालिकामा रहेका अन्य समूहले पनि नयाँ प्रविधिको माग गरेका छन् । गाउँपालिकाले आगामी आवमा उद्यम विकास कार्यक्रमलाई प्राथमिकतामा राखेको छ । ताराखोलामा अल्लो प्रशस्त पाइने हुँदा त्यसको व्यावसायिक प्रवर्द्धनमा गाउँपालिका लागिपरेको छ । अल्लोको प्रवर्द्धनका लागि स्थानीय जनप्रतिनिधि, कर्मचारी, शिक्षक लगायतले अल्लोबाट बनेका कपडा र सामग्री अनिवार्य प्रयोग गर्ने व्यवस्था गरिने भएको छ ।

यस्तै अन्यत्र बजारीकरणका लागि पनि गाउँपालिकाले सघाउ पु¥याउनेछ । अल्लो पहाडी भू–भागमा पाइने वनस्पति हो । अल्लोको बोक्रामा हुने रेशा नरम, बलियो र चम्किलो हुने हुँदा धागो बनाउन प्रयोग गरिन्छ । अल्लोको धागोबाट जुत्तादेखि, कपडा, झोला, टोपी लगायतका सामग्री बनाउन सकिन्छ । स्थानीय उत्पादन भएकाले अल्लोको कपडाप्रति प्रयोगकर्ताको आकर्षण छ ।

उद्यमीले अल्लोको कपडाबाट पर्याप्त आम्दानी गर्न सक्नेछन् । अल्लोसंगै ढाका बुनाइ, सिलाइकटाइ, सिकर्मी, डकर्मी लगायतका सीपमूलक तालीम पनि गाउँपालिकाले सञ्चालन गर्दैआएको छ । अन्य सरकारी निकाय र संघसंस्थासंग सहकार्य गरेर उद्यम विकासमा अघि बढ्न गाउँपालिकाले योजना बनाएको छ ।
रासस

प्रतिक्रिया दिनुहोस्