पाल्पामा ६३ हजार मतदाता थपिए

आगामी स्थानीय तहको निर्वाचनका लागी पाल्पामा ६३ हजार मतदाता थपिएका छन् ।

वि.सं २०७० को संविधान सभाको निर्वाचनमा १ लाख ४ हजार २ सय ८२ मतदाता निर्वाचनमा सहभागी रहेका थिए । अब हुने स्थानीय तहको निर्वाचनमा ६३ हजार ५ सय ६५ मतदाता थपिएको छ ।

अब १ लाख ६७ हजार ८४७ मतदाताले मतदान गर्न पाउने छन् । त्यसमध्ये पुरुष ८० हजार ५४, महिला ८७ हजार ७९२ रहेका छन् । एकजना तेस्रोलिङ्गी मतदाता रहेको जिल्ला निर्वाचन कार्यालय पाल्पाका सूचना अधिकारी थमन सारुले बताए ।

जिल्लामा विवाह गरेर आउने महिला, विदेशबाट फर्किएका पुरुष र उमेर पुगेका व्यक्तिका कारण मतदाता संख्या बढको हो ।

यसपटक मतदाताले नामावलीमा नाम दर्ता गराउन विशेष चासो दिएका कारण पनि संख्या बढेको हो । लामो समयपछि स्थानीय तहको चुनाव हुन लागेकाले पनि चासो बढेको हो । रासस