भक्तपुर, २६ चैत ।
नेपाल मजदुर किसान पार्टीका अध्यक्ष नारायणमान बिजुक्छेंले स्थानीय तहको निर्वाचन देशभर एकै चरणमा गर्नुपर्ने बताएका छन् ।
नेपाल प्राध्यापक समाजको पहिलो राष्ट्रिय भेलालाई शनिबार भक्तपुरको ठिमीमा सम्वोधन गर्दै उनले दुई चरणमा गर्ने कुरा निर्वाचन नगराउने षड्यन्त्र भएको बताए ।
बिजुक्छेले मिति घोषणा भएर तयारीसमेत भइसकेको अवस्थामा दुई चरणमा निर्वाचन गर्ने कुरा आत्मसमर्पणवादी सोचको परिणाम भएको आरोप लगाए । मधेस केन्द्रित दलको इसारामा निर्वाचनको मिति सार्न नहुनेमा उनले जोड दिए ।
“जनसङ्ख्याको आधारमा स्थानीय तह निर्धारण गर्नुपर्ने, निर्वाचन क्षेत्र कायम गर्नुपर्ने र मतदाता नामावली थप गर्नुपर्ने मधेस केन्द्रित दलको माग राष्ट्रिय हितमा छैन्,” उनले भने ।
पछिल्लो समय ठूला दलका कारण मुलुकको राजनीतिक क्षेत्र विकृति बन्दै गएकाले संसदलाई प्राज्ञिक थलोको रुपमा विकास गर्नुपर्नेमा उनले जोड दिए । रासस
प्रतिक्रिया