रुकुममा गत आर्थिक बर्षमा ९५ प्रतिशत रकम खर्च

रुकुम । जिल्ला समन्वय समिति, रुकुमले गत आर्थिक बर्ष २०७३/०७४ मा ९५ प्रतिशत रकम खर्च गरेको बताएको छ । समन्वय समितिमा प्राप्त भएको जम्मा रु ८४ करोड ४२ लाख ९९ हजार मध्ये रु ८० करोड ७९ लाख ६१ हजार खर्च गर्न सफल भएको जिल्ला समन्वय समितिले बताएको छ ।

जिल्लामा भौतिक प्रगति पनि ९५ प्रतिशत नै भएको स्थानीय विकास अधिकारी नरेन्द्रकुमार रानाले जानकारी दिए । गत आर्थिक बर्षमा समन्वय समितिमार्फत काम हुन नसकेर रु तीन करोड ६३ लाख ३७ हजार फिर्ता गएको उनले बताए जसमा पूँजीगततर्फको रु दुई करोड ५७ लाख ६८ हजार र चालुतर्फको रु एक करोड पाँच लाख ६८ हजार फिर्ता गएको बताएको छ ।

जिल्लामा सञ्चालन हुने निर्वाचन क्षेत्र विकास कार्यक्रम सञ्चलानमा निकै समस्या हुने उनको भनाइ छ । राजनीतिक दलको भागबण्डाका आधारमा योजना छनोट हुने भएकाले त्यसलाई कार्यान्वयन गर्नका लागि चुनौती रहेकाले सबैभन्दा बढी निर्वाचन क्षेत्र विकास कै रकम फ्रिज भएको स्थानीय विकास अधिकारी रानाको भनाइ छ ।

जिल्लामा आएको रकमलाई कार्यान्वयन गरेर विकास निर्माणको कामलाई पूरा गर्नुपर्ने जिम्मेवारी सबैको भएकाले आगामी दिनमा यहाँको विकासका लागि सबैले आ–आफ्नो ठाउँबाट सक्दो सहयोग गर्न आग्रह गरे । विकास निर्माणको कार्यलाई पूरा गर्न एउटा निकाय वा व्यक्ति कसैले पनि गर्न नसक्ने भएकाले सबैको एकता आवश्यक पर्ने उनको भनाइ थियो ।

गत आर्थिक बर्षमा यहाँ सबैभन्दा बढी रकम सडक निर्माणमा खर्च भएको बताइएको छ । जिल्लामा सञ्चालन भएका ठूला आठ सडक आयोजनाको काम अपेक्षा अनुसारको हुन नसकेको कारण पनि बढी रकम फ्रिज भएको जिल्ला समन्वय समितिको भनाइ छ ।
रासस