Logo

चाँगुनारायण नगर प्रमुख, उपप्रमुखमा एमाले विजयी



१६ जेठ भक्तपुर। चाँगुनारायण (गरपालिकाकाको नगर प्रमुख र उपप्रमुखमा नेकपा (एमाले)का उम्मेदवार विजयी भएका छन् ।

नगरप्रमुखमा एमालेका केन्द्रीय सदस्यसमेत रहेका सोम मिश्रले ८ हजार ५१२ मत प्राप्त गरी विजयी भएका छन् । उनका निकटतम प्रतिद्वन्द्वी नेपाली कांग्रेसका राजाराम खड्काले ६ हजार ८६९ मत प्राप्त गरी पराजित हुनुभयो ।

यसैगरी, उपप्रमुखमा एमालेकी विना बाँस्तोलाले ८ हजार ७८९ मत प्राप्त गरी विजयी भइन् । उनका निकटतम प्रतिद्वन्द्वी राधा बानियाँले ६ हजार ४७६ मत प्राप्त गरी पराजित भएकी छन् ।

चाँगुनारायण नगरपालिकामा राप्रपाबाट मेयरमा उठेका रवीन्द्रप्रताप शाहले ५ हजार १९८, उपप्रमुखका उम्मोर यवती कार्कीले ४ हजार ५४५ मत पाएका छन् । नेपाल मजदुर किसान पार्टीबाट मेयर पदमा उठेका न्हुछे फोजूले ४ हजार ४४२ र उपप्रमुख रीता काफ्लेले ४ हजार २२ मत पाएका छन् ।

त्यसबाहेकका अन्य दलले एक हजार मत पनि नघाउन सकेनन् । कूल ३४ हजार ४४८ मतदाता रहेको यस नगरपालिकामा २८ हजार ९१ मत खसेको थियो ।

यस नगरपालिकामा नेपाली कांग्रेस पहिलो, नेमकिपा दोस्रो र एमाले वा राप्रपामध्ये एक दल तेस्रो हुन्छ भन्ने नेपाली काँग्रेस र नेमकिपाको दाबीलाई चिर्दै अन्ततः एमाले पहिलो दल बन्न सफल भएको छ ।

चाँगुनारायण नगरपालिकामा वडा नं १, २, ५ र ७ मा नेपाली काँग्रेसको समूह विजयी भएपनि वडा नं। ३, ४, ६, र ८ मा एमालेको समूह नै विजयी भएको छ । वडा नं ५ र ७ मा एक–एक सदस्यमा एमालेका उम्मेदवार नै विजयी भएका थिए ।

निर्वाचित भएलगत्तै प्रतिक्रिया दिँदै नगरप्रमुखमा निर्वाचित मिश्रले घोषणापत्रअनुसार नै एमालेले काम गर्ने र चाँगुनारायण नगरपालिकाको समग्र विकास गर्दै यस नगरपालिकाको मुहार फेर्ने प्रतिबद्धता व्यक्त गरे ।

त्यसैगरी, चाँगुनारायण नगरपालिका–९ मा भने नेपाल मजदुर किसान पार्टीको समूह विजयी भएको छ । वडा अध्यक्षमा १ हजार ५१ मत प्राप्त गरी गणेश त्यात विजयी भएका छन् भने उनका निकटतम प्रतिद्वन्द्वी एमालेका सुवास ढुङ्गानाले ९ सय ९५ मत प्राप्त गरेका छन् ।

त्यसैगरी, महिला सदस्यमा नेमकिपाकै कमला गिरीले १ हजार ५२, दलित महिला सदस्य सुमित्रा दर्जीले १ हजार ४४, सदस्य विद्यापति थापाले ९ सय ८३ मत र कृष्णराम वासुकलाले १ हजार ३२ मत प्राप्त गरी विजयी भएका छन् । रासस

प्रतिक्रिया दिनुहोस्