सडक कालोपत्र गर्न स्थानीयवासीको २५ लाख

बेँसीसहर (लमजुङ), सदरमुकाम बेसीसहरका स्थानीयवासीले रकम संकलन गरी सडक कालोपत्र गरेका छन् ।

बेँसीसहर नगरपालिका– ८ का बासिन्दाले रु. २५ लाख सङ्कलन गरी चक्रपथ सडकखण्ड अन्तर्गत ३८५ मिटर सडक कालोपत्र गरेका हुन् । सो सडक कालोपत्रको लागि उपभोक्ताबाट रु २५ लाख सङ्कलन भएपछि बेँसीसहर नगरपालिकाबाट रु. २५ लाख प्राप्त भएको र यस काममा रु. ५० लाख खर्च भएको उपभोक्ता समितिका अध्यक्ष भरत पौडेलले बताए ।

सडक कालोपत्र गर्न सडकमा घर हुनेबाट प्रति मिटर तीनहजार रुपैया र सडकदेखि ५० मिटर पछाडी घरजग्गा हुनेबाट प्रतिमिटर एक हजार ५०० उठाइएको उपभोक्ता समितिका सचिव अर्जुन अधिकारीले बताए । रासस