Logo

तेह्रथुममा मुख्य पदका उम्मेदवार टुङ्ग्याउँदै दल



तेह्रथुम, जिल्लाका दुई नगरपालिका र चारवटै गाउँपालिकाका मुख्य पदमा ठूला राजनीतिक दल उम्मेदवार चयनमा व्यस्त छन् ।

एउटै पदमा पाँच जनासम्म आकांक्षी देखिएपछि दललाई उम्मेदवार चयन गर्न सकस परेको हो । जिल्लाका नगरपालिका र गाउँपालिकाका प्रमुख पदमा नेपाली कांग्रेस, एमाले र माओवादी केन्द्रले अहिलेसम्म कसैको नाम घोषणा गरेका छैनन् ।

दलहरुले वडास्तरमका अधिकांश ठाउँमा सबै उम्मेदवार सर्वसम्मत बनाएको बुझिएको छ । जिल्लाका सबै ४३ वटै वडाको उम्मेदवारी चयन सकिए पनि नगरपालिका र गाउँपालिकाको प्रमुख–उपप्रमुख पदको उम्मेदवार चयन नसकिएकाले औपचारिक रुपमा घोषणा गर्न अझै केही दिन लाग्ने सम्बद्ध दलका पदाधिकारीले बताएका छन् ।

केही उम्मेदवारले भने आफ्नो दलको आधिकारिक घोषणा बिनानै प्रचारप्रसार समेत सुरु गरेका छन् । उम्मेदवारको फोटो टाँसेर बनाइएका प्रचारका सामग्री सामाजिक सञ्जालमा छाएका छन् भने सार्वजनिक रुपमै समेत प्रचार थालिएको छ ।

माओवादी केन्द्रले भने कांग्रेस र एमालेसँग गठबन्धनको प्रयास गर्दै कुरा नमिलेका स्थानमा मात्रै एकल उम्मेदवारी दिने जनाएको छ ।

नेपाली कांग्रेसले सदरमुकाम म्याङलुङमा केन्द्रीय सदस्य सीता गुरुङ, सभासद् गणेश विमलीसहित जिल्लाका नेताको बैठकबाट समेत सबै स्थानको सहमति जुटाउन नसकेपछि उम्मेदवारको टुङ्गो लगाउन केन्द्रीय समितिमै पठाएको छ ।

जिल्लाका दुई नगरपालिका र तीन गाउँपालिकाका प्रमुख पदमा सहमतिबाटै उम्मेदवार छानिएको कांग्रेस जिल्ला सभापति गोविन्द ढुंगानाले बताए । तर एउटा गाउँपालिकाका आकांक्षीबीच सहमति जुटाउन नसकेपछि केन्द्रीय समितिमा पठाइएको हो ।

उनका अनुसार कांग्रेसले लालीगुराँस नगरपालिकाको प्रमुखमा अर्जुनबाबु मावोहाङ र उपप्रमुखमा तिला पोखरेल, म्याङलुङ नगरपालिकाको प्रमुखमा रणविक्रम (कमल) सुब्बा, छथर गाउँपालिकाको प्रमुखमा टेकराज तिगेला, मेन्छ्यायेम गाउँपालिकाको प्रमुखमा देउमान लिम्बू र आठराई गाउँपालिकाको प्रमुखमा नारायणकुमार इङनामलाई उम्मेदवार बनाएको छ ।

फेदाप गाउँपालिकामा भने आकांक्षी केशवप्रसाद भेटुवाल, चन्द्र मादेम्बा र महेन्द्र फोम्बोबीच सहमति जुटाउन नसकिएपछि केन्द्रीय समितिमै पठाइएको सभापति ढुङ्गानाले बताए । म्याङलुङ नगरपालिकासहित छथर, मेन्छ्यायेम र आठराई गाउँपालिकाको उपप्रमुख र उपप्रमुख पदका उम्मेदवार पनि चयन भइनसकेको उनले बताए ।

एमालेले केही दिन अगावै जिल्ला कमिटिबाट उम्मेदवारको नाम सिफारिस गरेर प्रदेश कमिटिमा पठाएको छ प्रदेश कमिटिलाई पनि उम्मेद्वारको टुङ्गो लगाउन कठिन भएको बताइएको छ
एमालेले म्याङलुङ नगरपालिकाको प्रमुखमा सञ्जयकुमार तुम्बाहाम्फे र उपप्रमुखमा पार्वता सानु डाँगी तथा लालीगुराँस नगरपालिकाको प्रमुखमा कलम खड्का र उपप्रमुखमा जमुना मगरलाई उम्मेदवार बनाउने भएको छ ।

यस्तै छथर गाउँपालिकाको प्रमुखमा सन्तोष तिगेला र उपप्रमुखमा तारा ढकाल, मेन्छ्यायेम गाउँपालिकाको प्रमुखमा यादवबहादुर खापुङ र उपप्रमुखमा दिलकुमारी शङ्कर, फेदाप गाउँपालिकाको प्रमुखमा हरिबहादुर चोङवाङ र उपप्रमुखमा गीता थापा, तथा आठराई गाउँपालिकाको प्रमुखमा विष्णुविक्रम कन्दङवा र उपप्रमुखमा रुपा कन्दङवालाई उम्मेद्ववार बनाउने निर्णय भएको एमाले प्रदेश नं– १ सदस्य तेजमान कन्दङवाले बताए ।

जिल्लामा राप्रपा, नेकपा माले, नयाँ शक्ति नेपाल, सङ्घीय लिम्बूवान मञ्चलगायत साना दलले पनि एकल उम्मेद्वारी भन्दा समीकरणको अभ्यासलाई जोड दिएका छन् । नयाँ शक्ति नेपाल र सङ्घीय समाजवादी फोरमले संयुक्त रुपमा उम्मेद्वारी दिने भएका छन् ।

तथापि जिल्लामा स्थानीय तह निर्वाचनमा विशेषतः कांग्रेस–एमालेबीचमै विशेष प्रतिस्पर्धा हुने निश्चित छ । स्थानीय तहको निर्वाचन भएकाले मतदातामा कुन दलको को उम्मेद्वार छ रु भनेर अत्यधिक चासो भएपनि अहिलेसम्म दलहरुले आफ्नो आधिकारिक उम्मेद्ववार टुङ्गो लगाउन नसकेकाले मतदातामा अन्योलता छाएको छ । मतदातालाई राजनीतिक दलका उम्मेद्ववारमा मात्र होइन, ती दलले के–कस्ता विकासका एजेन्डा अघि सारेका छन् । भन्नेमा पनि अत्यधिक चासो भएपनि अहिलेसम्म कुनै पनि दलले घोषणा पत्रसमेत सार्वजनिक नगरेकाले मतदाता अन्यौलमा छन् । रासस

प्रतिक्रिया दिनुहोस्