भीमदत्तनगर, स्थानीय तहको दोस्रो चरणको निर्वाचनका लागि नेकपा माओवादी केन्द्र कञ्चनपुरले यहाँका नौ वटै तहका प्रमुख र उपप्रमुखको टुङ्गो लगाएको छ ।
कञ्चनपुर सदरमुकाम रहेको भीमदत्तनगरपालिका प्रमुखमा पार्टीका केन्द्रीय सदस्य गोपाल रसाइली र उपप्रमुखमा नारु सिंहलाई उम्मेदवार बनाएको छ । त्यसैगरी वेदकोट नगरपालिका प्रमुखमा मीनराज गिरी र उपप्रमुखमा सुमित्रा शाहीलाई उम्मेदवार बनाइएको छ । शुक्लाफाँटा नगरपालिका प्रमुखमा लोकेन्द्र ऐरी, उपप्रमुखमा कमला ऐर, कृष्णपुर नगरपालिका प्रमुखमा जोगराम चौधरी र उपप्रमुखमा शर्मिला थापा, पुनर्बास नगरपालिका प्रमुखमा वीरबहादुर थापा र उपप्रमुखमा सीता विकलाई उम्मेदवार बनाइएको माओवादी केन्द्र कञ्चनपुरले जनाएको छ ।
त्यसैगरी बेलौरी नगरपालिका प्रमुखमा मोतीलाल चौधरी उम्मेदवारका रुपमा अघि सारिए पनि उपप्रमुख उम्मेदवार टुङ्गो लाग्न बाँकी छ । त्यसैगरी महाकाली नदी पारिको महाकाली नगरपालिका प्रमुख र उपप्रमुखको टुङ्गो सोमबारसम्म लाग्ने जनाइएको छ । यहाँको लालझाडी गाउँपालिका अध्यक्षमा मदन बडायक र उपाध्यक्षमा सत्या महरा तथा बेल्डाँडी गाउँपालिका अध्यक्षमा नन्दकिशोर एसके र उपाध्यक्षमा कल्पना गिरीलाई उम्मेदवार बनाइएको माओवादीका केन्द्रीय सदस्य एवं भीमदत्त नगरपालिका प्रमुखका उम्मेदवार रसाइलीले जानकारी दिए ।
नेकपा एमालेले यसअघि नै यहाँका सबै तहका लागि आफ्ना उम्मेदवार टुङ्गो लगाएर चुनावी प्रचारमा जुटिसकेको छ । माओवादी केन्द्रले पनि उम्मेदवारसहित घरदैलो अभियानलाई जिल्लाव्यापी बनाएको छ । उता सबैभन्दा ठूलो दल नेपाली कांग्रेस कञ्चनपुरले भने उम्मेदवारको टुङ्गो लगाउन सकेको छैन । बिनाउम्मेदवार चुनावी प्रचार प्रसारमा जुटेको कांग्रेसभित्र उम्मेदवारका आकाङ्क्षी धेरै भएकाले समस्या भइरहेको छ । कांग्रेस कञ्चनपुरका सचिव दिवाकर पाण्डेयले सोमबार कञ्चनपुरका सबै तहको प्रमुख–उपप्रमुखको टु्ङ्गो लाग्ने बताए ।
आकाङ्क्षी उम्मेदवारको नामावली लिएर कांग्रेस कञ्चनपुरका पार्टी सभापति हरिप्रसाद बोहरा र यहाँका निर्वाचन क्षेत्रस्तरीय सभापति काठमाडौँ पुगेका छन् । केन्द्रीय समितिले गठन गरेको उम्मेदवार छनोट समितिले सोमबारसम्म कञ्चनपुरका प्रमुख र उपप्रमुख उम्मेदवार टुङ्गो लगाउने पार्टी सचिव पाण्डेयले बताए । रासस
प्रतिक्रिया