Logo

पीआर लिएका जनप्रतिनिधी स्वतः हट्ने



रञ्जित तामाङ

काठमाडौं, १२ जेठ

स्थानीय तहमा निर्वाचित कुनै जनप्रतिनिधीले अरू मुलुकको स्थायी आवसीय अनुमतिपत्र (पीआर) लिएको पाइएमा उसको पद स्वतः खारेज हुने सरकारले स्पष्ट पारेको छ ।

पीआर लिइसकेको भए आफ्नो पद र पीआरमध्ये एक छोड्नु पर्ने संघीय मामिला तथा स्थानीय विकास मन्त्रालयले जनाएको छ ।

मन्त्रालयका सचिव दिनेश थपलियाले पीआर लिएका नागरिक चुनावी प्रतिस्पर्धाका लागी अयोग्य हुने र चुनाव जिते पनि पद स्वतः खारेज हुने स्पष्ट पारे ।

“संविधानको धारा २९१ अनुसार विदेशको स्थायी आवसीय प्रमाणपत्र लिइसकेको नागरिक चुनावमा भाग लिन पाउँदैनन्,” थपलियाले भने, “भूलचुकले कोही पीआर लिएका नागरिकले निर्वाचन जितेछन् भने उ पदबाट स्वतः हट्छ ।”

दोस्रो चरणमा हुन लागेको निर्वाचनमा पनि पीआरबारे स्पष्ट भएर मात्रै उम्मेद्वार छनोट गर्न थपलियाले सुझाव दिए । संविधानको धारा २९१ मा निर्वाचनमा निर्वाचित, मनोनित र नियुक्तिका लागी योग्य नहुने उल्लेख छ ।

मुलुकभर ३५ हजारभन्दा जनप्रतिनिधी निर्वाचित हुने र त्यति धेरै जनप्रतिनिधीमध्ये कसै न कसैले पीआर लिन सक्ने शंका मन्त्रालयका अधिकारीहरूमा छ ।

पीआर लिए÷नलिएको बारे मन्त्रालयले पनि अध्ययन गर्ने थपलियाले बताए । साथै जनप्रतिनिधीको आचारसंहिता बनाउँदा पनि पीआरको बिषयलाई समेट्ने थपलियाले बताए ।

प्रतिक्रिया दिनुहोस्