Logo

निर्वाचन गतिविधिः विभिन्न जिल्लामा उत्साहपूर्वक मनोनयन



काठमाडौँ, विभिन्न जिल्लामा स्थानीय तह निर्वाचन सन्दर्भमा मंगलबार उत्साहपूर्वक सहभागिताका विविध गतिविधि सम्बन्धि समाचार प्राप्त भइरहेका छन् ।

बनेपाः बाजागाजा, ब्यानर र झन्डासहित उत्साहपूर्वक सहभागितामा काभ्रेपलाञ्चोकमा राजनीतिक दलले उम्मेदवारको मनोनयन गरेका छन् ।

नेपाली कांग्रेस, नेकपा (एमाले), नेकपा (माओवादी केन्द्र), राष्ट्रिय प्रजातन्त्र पार्टी, मधेसी जनअधिकार फोरम, नेपाल मजदुर किसान पार्टीलगायत विभिन्न राजनीतिक दलले मंगलबार रातिसम्म मनोनयन दर्ता गराएका हुन् । दलसंगै विभिन्न ठाउँमा स्वतन्त्र उम्मेदवारीसमेत परेको छ ।

नेपाली कांग्रेसले बनेपा नगरपालिकाको प्रमुखमा राम जोशी, उपप्रमुखमा निर्मला श्रेष्ठ, धुलिखेल नगरपालिकाको प्रमुखमा रमेश हुमागार्इं, उपप्रमुखमा निर्मला योगल श्रेष्ठ, पनौती नगरपालिकाको प्रमुखमा विदुर वञ्जरा, उपप्रमुखमा अन्जु रञ्जित, नमोवुद्ध नगरपालिकमा कुन्साङ लामा, उपप्रमुखमा कमला खनाल, पाँचखाल नगरपालिकामा महेश खरेल, उपप्रमुखमा लक्ष्मी दनुवार, मण्डन देउपुरमा अच्युत पौडेल, उपप्रमुखमा राधिका ढकालले मनोनयन दर्ता गराएका छन् ।

यसैगरी, रोशी गाउँपालिकाको प्रमुखमा दलबहादुर तामाङ, उपप्रमुखमा लक्ष्मी बर्तौला, तेमाल गाउँपालिकाको प्रमुखमा सलामसिंह लामा, उपप्रमुखमा दुर्गामाया लामा, चौँरी देउराली गाउँपालिकाको प्रमुखमा विक्रमराज गौतम, खानीखोला गाउँपालिकाको प्रमुखमा गोपाल दर्लामी, उपप्रमुखमा तारादेवी आचार्य, बेथानचोक गाउँपालिकाको प्रमुखमा गोपाल तिमल्सिना, उपप्रमुखमा सरिता लामिछाने तामाङ, भुम्लु गाउँपालिकामा तस्बिर लामाले उम्मेदवारी दर्ता गराएका छन् ।

त्यस्तै, नेकपा (एमाले)ले बनेपा नगरपालिकाको प्रमुखमा लक्ष्मीनरसिंह वादे, उपप्रमुखमा रेखा दाहाल, धुलिखेलमा अशोक व्याञ्जु, उपप्रमुखमा जमुना लामा, पाँचखालको प्रमुखमा रुद्र बानियाँ, उपप्रमुखमा भक्तकुमारी लामा, नमोबुद्धको प्रमुखमा टिपी तिमल्सिना, उपप्रमुखमा रामदेवी लामा, मण्डन देउपुरको प्रमुखमा टोकबहादुर वाइवा, उपप्रमुखमा निर्मला शाही, चौँरी देउराली गाउँपालिकामा लेखराज गौतम प्रमुख तथा उपप्रमुखमा यशु लामा, भूम्लु गाउँपालिकाको प्रमुखमा गुमानध्वज कुँवर, उपप्रमुखमा कल्पना श्रेष्ठले मनोनयन दर्ता गराएका छन् ।

यसैगरी, तेमाल गाउँपालिकाको प्रमुखमा प्रदीप लामा, उपप्रमुखमा उषा घिसिङ, रोशी गाउँपालिकाको प्रमुखमा बज्रध्वज वाइवा, महाभारत गाउँपालिकाको प्रमुखमा राजकुमार कुँवर, उपप्रमुखमा रविमाया अस्तानी, बेथानचोक गाउँपालिकाको प्रमुखमा प्रेम लामा, उपप्रमूखमा उन्नति केसी, खानीखोलामा कृष्णबहादुर खुलाल र उपप्रमुखमा रुक्मणी गुरुङ रहेका छन् । उम्मेदवारी दर्ता गराएका मध्ये टोकबहादुर वाइवा र ब्याञ्जु नेकपा (एमाले) काभ्रेपलाञ्चोकको अध्यक्ष र उपाध्यक्ष हुन् ।

यस्तै, नेकपा (माओावादी केन्द्र)बाट बनेपा नपाको प्रमुखमा भोला अर्याल, उपप्रमुखमा सुशिला श्रेष्ठ, धुलिखेलको प्रमुखमा सरस्वती लामा, उपप्रमुखमा दीनदयाल श्रेष्ठ, पनौती नगरपालिका प्रमूखमा जगन्नाथ गिरी, उपप्रमुखमा विमला सापकोटा, नमोबुद्धको प्रमुखमा रत्न लामा, उपप्रमुखमा नानु घतामी, पाँचखालमा आइतेसिंह तामाङ, उपप्रमुखमा अस्मिता थापा मगर, मण्डन देउपुरमा रीता ढकाल, उपप्रमुखमा निरञ्जन विष्ट, चौँरी देउराली गाउँपालिकाको प्रमुखमा दीनानाथ गौतम, उपप्रमुखमा तारा गौतम, खानीखोलामा इन्द्रबहादुर थिङ, उपप्रमुख विष्णुमाया तामाङ, महाभारतमा कान्छामान जिम्वा, उपप्रमुखमा रीना मगर, तेमालमा गङ्गाबहादुर दोङ र उपप्रमुख कल्पना लामाले मनोनयन दर्ता गराएकाछन् ।

उम्मेदवार मनोनयन गरेकामध्ये दीनानाथ गौतम, इन्द्रबहादुर थिङ र गङ्गाबहादुर दोङ क्रमसः जिल्लाका अध्यक्ष, उपाध्यक्ष र सचिव हुन् । जिल्लामा २६ दल निर्वाचन कार्यालयमा दर्ता भएका छन् । मनोनयनपछि आज उम्मेदवारको सूची प्रकाशन र उम्मेदवारको विरोधमा उजुरीको कार्यक्रम रहेको छ ।

प्रमुख पदमा तीन महिलाको उम्मेदवारी

धुलिखेलः काभ्रेपलाञ्चोक जिल्लामा प्रमुख पदमा तीनजना महिलाको उम्मेदवारी दर्ता भएको छ । जिल्लाको धुलिखेल नगरपालिकाबाट प्रमुख पदमा सरस्वती लामा (कविता), मण्डन देउपुर नगरपालिकाको प्रमुख पदमा रीता ढकाल (धरिना) र तेमाल गाउँपालिकाको अध्यक्षमा होम कुमारी तामाङ (अस्मिता)ले मंगलवार उम्मेदवारी मनोनयन दर्ता गरेका हुन् ।

लामा र ढकाल नेकपा (माओवादी केन्द्र)बाट प्रमुख पदमा उम्मेदवारी दिएका हुन् भने तामाङ नयाँ शक्ति नेपाल पार्टीबाट रहेकी छन् । लामा र ढकाल नेकपा (माओवादी केन्द्र)का केन्द्रीय सदस्य हुन् भने लामा नयाँ शक्ति पार्टी नेपालका केन्द्रीय परिषद् सदस्य हुन् ।

निर्वाचनमा सरस्वती लामा (कविता)ले नेपाली कांग्रेसका २ नं क्षेत्रका क्षेत्रीय सभापति रमेश हुमागाईं र एमालेका जिल्ला उपाध्यक्ष अशोक ब्याञ्जु संगको प्रतिस्पर्धामा उभिएका छन् । उता होमकुमारी तामाङ (अस्मिता)ले नेकपा (माओवादी केन्द्र)का केन्द्रीय सदस्य गङ्गाबहादुर तामाङ (बमध्वज), नेकपा (एमाले)का जिल्ला सदस्य प्रदीप लामा र नेपाली कांग्रेसका सलाम सिं लामा संगको प्रतिस्पर्धामा उभिएका हुन् ।

ठूला दल नेपाली कांग्रेस र नेकपा (एमाले)ले भने उपप्रमुख र उपाध्यक्षमा मात्रै महिलालाई उम्मेदवारी मनोनयन गर्न अगाडि बढाएका छन् । राजनीतिक हिसाबले महिलालाई पुरुषसँग प्रतिस्पर्धा गर्न कठिन हुने र चुनावमा पदमा उठ्ने मात्रै नभई जित्ने पनि हुनुपर्ने भन्दै ती दलले महिलालाई प्रमुख वा उपप्रमुखमा नउठाएको बताएका छन् ।

नेपाली कांग्रेसका जिल्ला सभापति मधु आचार्यले यसअघि नै महिलालाई मुख्य पदमा उठाउने कुरा अवसर दिनका लागि मात्रै बताएका थिए । “हामीले महिलालाई प्रमुख पदमा उठाउने मात्रै होइन जितको सुनिश्चितता कस्को हुन्छ, उसलाइै नै दिने हा”, आचार्यको भनाइ थियो ।

एमालेले पनि महिलालाई उठाउने मात्रै नभई जीत देखाउन पनि महिलालाई प्रमुखमा उठ्न कठिन भएको भन्दै उपप्रमुख तथा उपाध्यक्षमा नै सिमित राखेको बताएको छ ।

तीन स्थानीय तहमा प्रमुख पदमा महिला

नवलपरासीः नवलपरासी जिल्लामा पहिलो चरणमा निर्वाचन हुने आठवटा स्थानीय तहमध्ये तीनवटा स्थानीय तहमा प्रमुख पदमा महिला उम्मेदवार बनेका छन् ।

पहिलो चरणमा स्थानीय तहको निर्वाचन हुने नवलपरासीको प्रदेश नं ४ अन्तर्गतका आठवटा स्थानीय तहमध्ये तीनवटा तहमा मुख्य प्रमुख पदमा महिला उम्मेदवार बनेका हुन् । विशेषगरी जिल्लाको कावासोती नगरपालिकामा नेकपा (एमाले)ले चन्दा पुनलार्इ नगरप्रमुख पदमा उम्मेदवार बनाएको छ ।

यता जिल्लाको हुप्सेकोट गाउँपालिकाबाट नेपाली कांग्रेसबाट गाउँपालिकाको अध्यक्ष पदमा लक्ष्मी पाण्डे उम्मेदवार बनेकी छन् । यसैगरी, मध्यविन्दु नगरपालिकामा नेकपा (माओवादी केन्द्र)बाट सुष्मा खनाल नगरप्रमुख पदमा उम्मेदवार बनेकी छन् । निर्वाचन हुने अन्य सबै नगरपालिका र गाउँपालिकाको प्रमुख पदमा राजनीतिक दलबाट पुरुष उम्मेदवार बनेका छन् भने उपप्रमुखमा महिलालाई उम्मेदवार बनाएको अवस्था छ ।

नवलपरासीमा हाल कायम १५ वटा स्थानीय तहमध्ये पहिलो चरणमा आठवटा स्थानीय तहमा मात्र निर्वाचन हुँदैछ । बाँकी सात स्थानीय तहमा दोस्रो चरणमा निर्वाचन हुनेछ । कायम भएका १५ वटा स्थानीय तहमध्ये प्रदेश नं ४ मा पर्ने आठवटा स्थानीय तहमा पहिलो चरणमा निर्वाचन हुनेछ जसमध्ये चार नगरपालिकामा र चारवटा गाउँपालिकामा निर्वाचन हुनेछ ।

यसअनुसार पहिलो चरणमा निर्वाचन हुनेमध्ये नगरपालिकातर्फ गैँडाकोट, देवचुली, कावासोती र मध्यविन्दुमा निर्वाचन हुनेछ भने गाउँपालिकातर्फ बुलिङटार, बुङ्गदीकाली, हुप्सेकोट र विनयी त्रिवेणी रहेका छन् । नवलपरासीमा आसन्न स्थानीय तहको निर्वाचनमा नगरसभातर्फ छ सय पाँच र गाउँसभातर्फ दुई सय ९२ जनप्रतिनिधि चयन हुने जिल्ला निर्वाचन कार्यालयका नायब सुब्बा चुडाविक्रम शाहीले जानकारी दिए । नवलपरासीमा कुल तीनलाख ६९ हजार आठसय ९४ मतदाता सङ्ख्या रहेको छ ।

यसैगरी, आठजना तेस्रोलिङ्गी मतदाताको सङ्ख्या रहेको जिल्ला निर्वाचन कार्यालयले जनाएको छ । जिल्ला निर्वाचन कार्यालयका अनुसार यस जिल्लामा दुईसय ३२ मतदानस्थल र चार सय ८७ मतदान केन्द्र रहनेछन् । नवलपरासीमा ३२ राजनीतिक दल दर्ता छन् ।

राससकर्मी गिरी उम्मेदवार

यसैबीच, राष्ट्रिय समाचार समिति (रासस) का नवलपरासी समाचारदाता विद्रोही गिरी गाउँपालिका प्रमुखको उम्मेदवार बनेका छन् । गिरी बुलिङ्गटारमा गाउँपालिका अध्यक्ष पदमा नेकपा (एमाले)का तर्फबाट उम्मेदवार बनेका हुन् । विसं २०६७ सालदेखि नवलपरासी समाचारदाताका रुपमा काम गर्दै आएका गिरी प्रेस चौतारी नेपालका केन्द्रीय सदस्यसमेत हुन् । रासस

प्रतिक्रिया दिनुहोस्