महानगरले अनलाइन बाटै हस्ताक्षर गर्ने

काठमाडौं, नागरिकलाई थप सुविधा दिन काठमाडौं महानगरपालिकाले अनलाइनबाटै नक्सामा हस्ताक्षर गर्ने भएको छ ।

गत साउनदेखि नै नक्साको काम अनलाइनबाट हुने गरेको भए पनि नक्सा पास गर्नेको हस्ताक्षर भने हातले गर्नुपर्ने थियो । सबै प्रक्रिया पूरा भएपछि नक्सा पास गर्ने व्यक्तिले हातले हस्ताक्षर गर्नुपर्ने अवस्था रहेकामा अब त्यो पनि अनलाइन बाटै हुने महानगरका इन्जिनियर राम थापाले जानकारी दिए । यो व्यवस्था भएसँगै नगरवासीलाई थप सुविधा पुग्ने विश्वास महानगरले लिएको छ ।

यसअघि नक्सा पासको सबै काम अनलाइनबाट भए पनि हस्ताक्षर हातले हुने हुँदा अन्तिम समयसम्ममा नक्सा पास गराउने व्यक्ति महानगरमा आउनुपर्ने थियो, अब नगरवासी यस किसिमको झन्झटबाट मुक्त हुने भएका छन् । घरबाट नै नक्सा पासका लागि दर्ता र पास भएको नक्सा लिन पाउनेछन ।

यो प्रक्रिया अघि बढाउनका लागि नीतिगत निर्णय भइसकेको र केही प्राविधिक समस्या समाधान हुनेबित्तिकै छिट्टै काम सुरु हुने थापाले जानकारी दिए ।

यससंगै महानगरले भवन निर्माणका लागि महानगरमा आएर नक्सा पास गर्ने र नक्साअनुरुप निर्माण कार्य नगर्ने पाइए पछि नियमित अनुगमनका लागि आफ्ना इन्जिनियरलाई नै हरेक दिन निर्माणस्थलमा खटाउन सुरु गरेको छ ।

यसरी निर्माणको समयमा नक्सा विपरीत काम भएको पाइएमा तत्काल रोक्ने तथा अन्य कारबाहीको प्रक्रियाअघि बढाइने महानगरले नगरवासीलाई चेतावनी दिएको छ । रासस