बनेपा, स्थानीय तह निर्वाचनका लागि काभ्रेपलाञ्चोकको दुर्गम क्षेत्रमा निर्वाचन सामग्री पठाउन थालिएको छ ।
सात गाउँपालिका र आठ नगरपालिका रहेको जिल्लाका अधिकांश गाउँपालिका र नगरपालिकाको निर्वाचन कार्यालयमा निर्वाचन सामग्री पठाइएको तथा केही गाउँपालिका र नगरपालिकामा शुक्रबार पठाउन लागिएको जिल्ला निर्वाचन कार्यालय, धुलिखेलले जनाएको छ ।
नमोबुद्ध नगरपालिका, बनेपा नगरपालिका र बेथानचोक गाउँपालिकामा शुक्रबार निर्वाचन सामग्री पठाउन लागिएको जिल्ला निर्वाचन अधिकारी, मधुकरप्रसाद पोखरेलले जानकारी दिए ।
उनका अनुसार निर्वाचन मनोनयनका लागि आवश्यक पर्ने मनोनयनपत्र, मतदाता नामावली, अनुसूची फारम लगायतका निर्वाचन सामग्री कोसीपारिको दुर्गम क्षेत्र चौरी देउराली गाउँपालिका, महाभारत शृङ्खला डाँडापारिको महाभारत गाउँपालिकमा समेत पुगिसकेको छ ।
त्यस्तै मतदाता शिक्षाका लागि पनि आवश्यक पर्ने विभिन्न सामग्री पनि गाउँगाउँ पुगेका छन् ।
जिल्लामा ३३० निर्वाचन शिक्षकमार्फत पाँच किसिमका विभिन्न पर्चा, नमुना मतपत्र, हाते पुस्तिका, प्रश्नोत्तर भएको पुस्तिकासमेत विभिन्न गाउँपालिका र नगरपालिकामा पुगेको निर्वाचन अधिकारी पोखरेलले बताए । उनले तामाङ र नेवार समुदायलाई लक्षित गरेर नेवारी र तामाङ भाषाका पम्प्लेट समेत काभ्रेपलाञ्चोकमा वितरण हुने जानकारी दिए ।
जिल्लाको बेथानचोक र तेमाल गाउँपालिकामा नेवारी र तामाङ भाषाका पम्प्लेट वितरण हुने छन । ती पम्प्लेट करिब १५० प्रति भएको बताइएको छ ।
निर्वाचन अधिकारी पोखरेलले मुख्य निर्वाचन अधिकृतको कार्यालयबाट स्थानीय तह निर्वाचनका लागि कर्मचारीको नियुक्ति पनि बुधबारबाट मात्रै सुरु भएको बताए । निर्वाचन आयोगले स्थानीय तहका लागि वैशाख ३१ गते पहिलो चरणको निर्वाचन गर्दै छ । रासस
प्रतिक्रिया