काठमाडौं महानगरपालिकाले तत्काल सुधारका ३० बुँदे योजना सार्वजनिक गरेको छ । आईतबार राजधानीमा आयोजित कार्यक्रममा योजना सार्वजनिक गर्दै महानगरका कार्यकारी अधिकृत इश्वरराज पौडेलले योजना सार्वजनिक गरेका छन् ।
नयाँ स्थानीय तह कार्यान्वयन भएकाे र सक्षम महानगर जनप्रतिनिधीलाइ महानगरपालिका हस्तान्तरण गर्न याेजना ल्याएकाे उनले बताए ।
यस्ता छन् याेजना
ब्रुमर खरिद– काठमाडौंमा धुलोको समस्या अत्यधिक रहेको र यस समस्याको हल गर्न धुलो तान्ने १० अत्याधुनिक बु्रमर खरिद गर्नेछ । ब्रुमरले सडकका साथै फुटपाथ र पेटीको पनि धुलो सोस्नेछ ।
तत्काल सुनुवाई– नागरिकको गुनासो र समस्याको सुनुवाई गर्न एक महिनाभित्र ३ सदस्यीय टोली गठन गर्नेछ ।
तीन सिफ्टमा सेवाप्रवाह– कार्यकारी अधिकृतसहित सबै कर्मचारीले तीन सिफ्टमा काम गर्नेछ । विहान ७ बजेदेखि ११, दिउँसो, १२ देखि ५ र ६ देखि १० बजेसम्म काम गर्ने घोषणा गरेको छ । कार्यालय समयबाहेक अरू बेला अधिकतम् फिल्डमा खटिनेछ । एक महिनाभित्र यो प्रक्रियाको थालनी हुनेछ ।
नमुना वडा– कम्तिमा ४ वटा वडालाई नमुना सेवा प्रवाहको केन्द्रका रुपमा ‘सेन्टर अफ एक्सिलेस’ बनाइनेछ । यी कार्यालयहरूलाई नागरिक र प्रविधिमैत्री बनाइनेछ । साथै सहरी क्लिनिकहरूलाई नमुनाको रुपमा विकास गराउनेछ । महानगरसँग रहेका सरसफाई मजदुरलाई भित्री सडक सफाईका लागी खटाउनेछ ।
काठमाडौं क्लिनर– सरसफाई मजदुरलाई काठमाडौं क्लिनरका रुपमा खटाउने योजना छ । मजदुरलाई हाफ ज्याकेट र टोपी बितरण गरि औपचारिक रुपमा खटाउनेछ ।
विकास दुत नियुक्त– राष्ट्रिय गानका सर्जक प्रदिपकुमार राई ‘व्यकुल माइला’ लाई काठमाडौं महानगरपालिकाको विकास दुत नियुक्त गरेको छ । उनी नागरिक सचेतनाको काममा अग्रसर हुनेछन् ।
ठूला रुख रोप्ने– नदी किनारमा ठूला रुख रोप्न ६ महिनाभित्र ५ वटा ‘ट्री ट्रन्सप्लानर’ खरिद गर्ने योजना छ ।
सुर्योदयअघि नै फोहोर उठाउने– बञ्चरे डाँडा र सिसडोलमा रहेको ल्यान्डफिल्ड साइटलाई व्यस्थित गरि विहान घाम उदाउनुअघि नै फोहोर उठाउने योजना बनाएको छ ।
महानगरको ठेकेदारको सुचिकरण– काठमाडौं महानगरपालिकाभित्र घर तथा भवन बनाउने ठेकेदारहरूलाई सुचिकृत गरेर भवन निर्माणसम्बन्धि तालिम दिनेछ ।
पर्यटन बस सञ्चालन गर्ने– महानगरले व्यवसायीहरूसँग सहकार्य गरि सार्वजनिक, नीजि, साझेदारी (पीपीपी) मोडलमा पर्यटक बस सञ्चालन गर्नेछ ।
सहरी यातायातमा सरलता– ध्वनी प्रदुशन, ट्राफिक जामलगायतका समस्या हल गर्न सरोकारवालाहरूसँग समन्वय गरेर ठोस योजना ल्याउनेछ । साथै पार्किङ व्यवस्थापन र वान वे बाटोहरू पहिचान गर्नेछ ।
उज्यालो काठमाडौं– महानगरभित्रका घरहरूको छतबाट बत्ति जडान गर्ने र अग्रभागलाई उज्यालो बनाउने योजना छ । एउटै गल्ली वा सडकमा बनेका घरहरूमा एउटै रङ रोगन लाउन प्रोत्सहित गर्नेछ । साथै घरको अग्रभागमा रङ रोगन लाउन पनि प्रोत्साहित गर्नेछ ।
कर अभियान– कर संकलनलाई बढाउन करदाता फारम भर्ने अभियान सुरू हुनेछ । यातायात कार्यालयहरूमा रहेका राजश्व काउन्टरहरूको पुनर्संरचना गर्नेछ । करको दायरा बढाउनुका साथै ठूला करदातालाई बिषेश व्यवस्था गर्नेछ ।
निर्माण सामाग्री थुपार्न नदिने– सडकमा जथाभावी निर्माण सामाग्री थुपारे जफत गर्नेछ । यसका लागी डोजर, लोडर र नगरप्रहरीको मोवाइल भ्यान परिचालन गर्नेछ ।
यसबाहेक महानगरले पुरातात्विक महत्वका सम्पदताको जर्गेना गर्ने, सहरी शौचालयको निर्माण गर्ने, बालाजु बाइसधाराको उद्यानको स्तरोन्नति गर्नेलगायतका योजनाहरू अघि सारेको छ ।
यसैगरि तीनकुनेको खाली जग्गालाई व्यवस्थित गर्ने, भवन निर्माणमा बेचौलियालाई हटाउने योजना अघि सारेको छ कार्यक्रममा उपप्रधान तथा संघीय मामिला तथा स्थानीय विकास मन्त्री कमल थापाले योजना कार्यान्वयनमा जोड दिएका थिए ।
प्रतिक्रिया