६ जेष्ठ २०८१, आइतबार | Sun May 19 2024

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

गाउँपालिका महासंघको राष्ट्रिय अधिवेशन चैतमा



स्थानीय खबर संवाददाता
काठमाडौं, ११ फागुन

गाउँपालिका राष्ट्रिय महासंघको राष्ट्रिय अधिवेशन चैतमा हुने भएको छ । महासंघका अनुसार चैतको १९, २० र २१ गते राजधानीमा अधिवेशन हुनेछ ।

महासंघका कार्यकारी निर्देशक विमल पोखरेलका अनुसार अधिवेशनले २९ सदस्यीय राष्ट्रिय समिति चयन गर्नेछ । गत ८ र ९ गते भक्तपुरमा महासंघले आयोजना गरेको भेलाले उक्त निर्णय गरेको हो । उक्त भेलामा ७ वटै प्रदेशबाट गाउँपालिकाका अध्यक्ष र उपाध्यक्षका प्रतिनिधीहरू सम्मिलित थिए ।

भेलाले साविकको गाउँ विकास समिति राष्ट्रिय महासंघको नाम परिर्वतन गरेर गाउँपालिका राष्ट्रिय महासंघ बनाएको छ । महासंघको विधानअनुसार मुलुकभर सबैभन्दा धेरै गाउँपालिकामा अध्यक्ष र उपाध्यक्ष जितेको दलबाट अध्यक्ष चुनिनेछ । यसैगरि दोस्रो भएको दलबाट महासचिव र तेस्रो हने दलबाट कोषाध्यक्ष चुनिनेछ ।

स्थानीय निर्वाचनको परिणामअनुसार सबैभन्दा धेरै अध्यक्ष र उपाध्यक्ष नेकपा (एमाले) ले जितेको छ । दोस्रो र तेस्रोमा क्रमशः नेपाली कांग्रेस र माओवादी केन्द्र छ । यस हिसाबले एमालेले अध्यक्ष, कांग्रेसले महासचिव र माओवादीले कोषाध्यक्ष पाउने सम्भावना छ ।

एमाले र माओवादीबीच पार्टी एकिकरण भइहालेमा के हुन्छ भन्ने जिज्ञाशामा पोखरेल भन्छन्, “निर्वाचन आयोगले एउटै दल भएको घोषणा नगरेसम्म छुट्टाछुट्टै दलका रुपमा गणना हुन्छ । आयोगले एउटै दल भएको घोषणा गर्यो भने तेस्रो ठूलो दल संघीय समाजवादी फोरम हुनेछ ।”

पोखरेलका अनुसार एमालेबाट १ सय ७३ अध्यक्ष र १ सय ९६ उपाध्यक्ष निर्वाचित भएका छन् । कांग्रेसबाट १ सय ६० अध्यक्ष र १ सय ३९ उपाध्यक्ष निर्वाचित भएका छन् । माओवादी केन्द्रबाट ७१ अध्यक्ष र ६६ उपाध्यक्ष निर्वाचित भएका छन् ।

यसैगरि संघीय समाजवादी फोरमबाट २३ अध्यक्ष र २६ उपाध्यक्ष निर्वाचित भएका छन् । राष्ट्रिय जनता पार्टीबाट ११ अध्यक्ष र १३ उपाध्यक्ष निर्वाचित भएका छन् । यसैगरि स्वतन्त्रबाट ६ अध्यक्ष र ५ उपाध्यक्ष निर्वाचित भएका छन् ।

महासंघले यसअघि नै प्रदेशस्तरीय संगठनहरू गठन गरिसकेकाे छ । महासंघ देशभरकाे गाउँपालिकाहरूकाे छाता संगठन हाे । महासंघले गाउँपालिकाहरूकाे संवैधानिक तथा कानुनीलगायतकाे अधिकारका लागी पैरवी गरिररहेकाे छ । साविककाे गाविस महासंघले पनि देशभरका गाविसहरूकाे अधिकारका लागी पैरवी गर्दै अाएकाे थियाे । महासंघ २०५२ सालमा गठन भएकाे थियाे ।

प्रकाशित मिति : ११ फाल्गुन २०७४, शुक्रबार ००:००