दोलखामा सडक निर्माणको २२ करोड रकम भुक्तानी गर्न बाँकी

१३ माघ। चरिकोट । डिभिजन सडक कार्यालय दोलखाले निर्माणलाई रु २२ करोड रकम भुक्तानी गर्न बाँकी छ । डिभिजन सडक कार्यलय दोलखाले विभिन्न समयमा ठेक्का सम्झौता गरेर निर्माण भइसकेको सडकको भुक्तानी दिन सकेको छैन । भुक्तानी नभए पछि केही निर्माण व्यवसायीले निर्माणको कामसमेत रोकेका छन् ।

डिभिजन सडक कार्यालय दोलखाका प्रमुख अशोक तिवारीले भुक्तानी दिन नसकिएको स्वीकारे । दोलखा र सिन्धुपाल्चोकका विभिन्न स्थानमा सडक निर्माण गरिसक्दा पनि रकम भुक्तानी गर्न बाँकी छ । एउटै निर्माण कम्पनीलाई ५० लाखदेखि ४ करोड रुपैयाँ भुक्तानी दिन बाँकी रहेको तिवारीले बताए ।

निर्माण सम्पन्न गरिसकेका व्यवसायीले भुक्तानी नपाउँदा गुनासो बढ्दै गएको छ । भुक्तानी नपाए पछि व्यवसायीहरूले गत महिना डिभिजनको कार्यलयमा तालाबन्दीसमेत गरेका थिए । बजेट नभएका कारण रकम भुक्तानी दिन नसकेको तिवारीले बताए । आफूले सडक विभागसँग रकम माग गरे पनि अर्थ मन्त्रालयले निकासा नगर्दा भुक्तानी गर्न नसकिएको तिवारीले बताए ।

रकम भुक्तानी दिन नसक्दा व्यवसायीले निमार्ण कार्यमा खटिएका मजदुरलाई पनि भुक्तानी दिन सकेका छैनन् । निर्माण सामग्री खरिद गरेको बिल भुक्तानीसमेत गर्न नसक्दा आगामी सरकारले निकाल्ने ठेक्कापट्टाको कामसमेत गर्न नसक्ने र बाँकी कामसमेत बीचैमा छोड्नु पर्ने अवस्था सिर्जना भएको महालक्ष्मी कन्ष्ट्रक्सन कन्सर्न प्रालिका साइड इञ्चार्ज तेजबहादुर भुजेल बताउँछन् ।

भुजेलका अनुसार ८ करोड लागतमा निर्माण शुरु गरिएको चरिकोट कालीञ्चोक सडकको ८ किलोमिटर र अन्यत्रका काम गरेर आफ्नो कम्पनीले कार्यालयसंग करिब ४ करोड रुपैयाँ लिन बाँकी छ ।

यस वर्षको साउन देखिको रकम भुक्तानी गर्न नसकिएको तिवारीले बताए । पेटी ठेकेदारलाई भुक्तानी गर्न, रड, सिमेन्ट, बालुवा, गिट्टी इकुमेन्टको खर्च, डिजेललगायतको खर्च तिर्न नसक्दा ठेकेदार समस्यामा परेको भुजेलले बताए । कार्यालयले करिब १० वटा निर्माण कम्पनीलाई भुक्तानी दिन बाँकी छ ।

जिरी शिवालय सडक, चरिकोट दोलखा सडक, सिन्धुपाल्चोकको केही सडकलगायत विभिन्न सडक आयोजनाको रकम भुक्तानी गर्न बाँकी रहेको छ । गौतमले देशैभरिका कार्यालयमा सडक निर्माणको रकम भुक्तानी गर्न नसकिएको र विभागले अर्थ मन्त्रालयसँग छलफल गरिरहेको हुँदा चाँडै रकम उपलब्ध हुने दाबी गरे । रासस