महाेत्तरीकाे गौशाला नगरपालिकामा ९० लाख गोलमाल, खाता नै नील पारेर रकम झिकियाे 

महोत्तरी, १७ असोज । महोत्तरीको गौशाला नगरपालिकामा ९० लाख रुपैयाँ गोलमाल भएको खुलासा भएको छ । नगरपालिकाको बैंक खाताबाट एकै दिनमा त्यति ठूलो रकम नियमविपरित तरिकाले निकासा भएको रहस्य सार्वजनिक भएको छ । गौशालास्थिति नेपाल बैंक लिमिटेडको शाखा कार्यालयबाट गएको भदौ १९ गते रु ९० लाख निकालेको रहस्य सार्वजनिक भएको हो ।

कार्यकारी अधिकृत रामजी जोशीलाई थाहै नदिई खातामा १ रुपैयाँसमेत नराखी रकम निकालेको पाइएको छ । खाता नै नील गरि तलबका लागि भन्दै चेक काटेर रकम निकालेको जानकारी नगरपालिकाका कार्यकारी अधिकृत रामजी जोशीले बताए ।

कार्यकारी प्रमुख जोशी भदौ १२ गते कार्यालयमा हाजिर भएपछि निर्वाचनमा व्यस्त भएका थिए । कार्यकारी प्रमुख निर्वाचनमा व्यस्त भएको मौका छोपी नगरपालिकाका केही कर्मचारीको मिलिभगतमा रकम गोलमाल पारिएको हो ।

“पैसा कसरी निकालिएको हो, मलाई कुनै जानकारी छैन, तर खातामा एक रुपैयाँ पनि छैन,” जोशीले भने । गौशाला नगरपालिकाले पछिल्लो एक महिनामा २ करोड ६४ लाख रुपैयाँको कारोबार गरे पनि कुनै कागजात आफूलाई प्राप्त नभएको उनले बताए ।

गौशाला नगरपालिकाका मेयर शिवनाथ महतोले निकासा भएको रकमको सम्बन्धमा अनुसन्धान भइरहेको दाबी गरे । “जनताको रकम लुट्ने कर्मचारी र भ्रष्टाचारीलाई कारबाही हुन्छ,” नवनिर्वाचित मेयर महतोले भने । रासस