चितवन, १२ भदौ । भरतपुर महानगरपालिकाको दुईवटा वडाका विजयी वडाध्यक्षले आज (सोमबार) शपथ लिएका छन् ।
मुख्य निर्वाचन अधिकृत कविप्रसाद न्यौपानेले वडा नं ४ का वडाध्यक्ष हरिप्रसाद आचार्य र वडा नं ७ का वडाध्यक्ष राजेन्द्रमणि काफ्लेले उनीहरुलाई शपथ गराउका हुन् । विजयी दुई वडाध्यक्षविरुद्ध विशेष अदालत पाटनको हेटौँडा इजलासमा परेको रिट निवेदन खारेज भएपछि उनीहरुलाई काम गर्ने बाटो खुलेको हो ।
निर्वाचनको मतगणनाका क्रममा मतपत्र च्यातिएपछि पुनः निर्वाचनका कारण झण्डै तीन महिना ढिला गरी अन्य पदमा विजयीले शपथ लिए पनि दुई वडाध्यक्षले शपथ लिन पाएका थिएनन् ।
यी दुवै वडामा नेकपा एमालेका उम्मेदवार विजयी भए पनि झिनो मतान्तरको हारमा नेपाली कांग्रेसका प्रतिद्वन्द्वीले मत गणनामा त्रुटि भएको आरोपसहित रिट दायर गरेपछि शपथ रोकिएको थियो ।
वडा नं ४ मा हरिप्रसाद आचार्य सात मत र वडा नं ७ मा राजेन्द्रमणि काफ्ले १४ मत अन्तरले विजयी भएका थिए । हेटौँडा इजलासले यही भदौ ८ गते सो रिट खारेज गरेसंगै काम गर्ने बाटो खुलेको हो ।
रासस
प्रतिक्रिया