जोरायल किसान व्यावसायिक कागती खेतीमा

जोरायल गाउँपालिका–५ गडसेराका लक्ष्मण देउवाले व्यावसायिक कागती खेती सुरू गरेका छन् ।

परीक्षणका लागि देउवाले ५ सय कागतीका बिरुवा रोपेका छन् ।

कागतीका बोटले फल दिन थालेपछि देउवा अहिले कामदार राखेर व्यवसायिक रुपमा लागिपरेका छन् ।

देउवाले यस वर्ष १ हजार कागतीका बिरुवा रोपेका छन् । केही वर्ष अघिसम्म अध्यापन पेशामा आवद्ध देउवा पछिल्लो समय पढाउन छोडेर व्यावसायिक कृषि पेशामा सक्रिय छन् ।

कागती भारतबाट आयात गर्नुपर्ने बाध्यता छ । कागती फलेपछि अहिले उनको नर्सरीमा हेर्न आउनेको घुइँचो नै लाग्छ ।

कागती खेती गर्न राम्रो सम्भावना भएको ठाउँ भएकाले अहिले यहाँका अधिकांश किसान व्यावसायिकरुपमा कागती खेती गर्न थालेका छन् ।

देउवाले गन्याप कृषि उत्पादन तथा बिक्री केन्द्र फार्म स्थापना गरेका छन् ।

उनले व्यावसायिक तरकारीखेती, गाई तथा भैँसीपालनसमेत गर्दै आएका छन् ।

जोरायल गाउँपालिकामा कागतीखेतीको राम्रो सम्भावना भएकाले कागतीको बिरुवा अनुदान कार्यक्रम सञ्चालन गरिएको गाउँपालिकाका अध्यक्ष दुर्गादत्त ओझाले बताए ।

“हामीले कृषी पेशालाई पहिलो प्राथमिकता दिएर बजेट विनियोजन गर्दै आएका छौँ,” दत्तले भने ।

यहाँका जोरायल, गड्सेरा, निरौली, केआई सिंह, शिखर नगरपालिकालगायत ठाउँमा कागतीखेतीको पर्याप्त सम्भावना भएको कृषि प्राविधिक मदन खड्काले बताए ।

चिसो र भिरालो जमिनमा कागती खेती गर्न सकिन्छ । बजारमा कागतीको चूकको मूल्य प्रतिलिटर २ देखी ५ सयसम्म पर्छ । रासस